* * *

Лым чарӧм вылын кодзув діяс —
Кыдз найӧс кытшовтны, он тӧд.
Быд ногыс вежласьӧны бияс;
Син радлӧ — видзӧдны он пӧт.

Кок улын кӧдзыд лымйыс дзуртӧ,
Пӧсь радлун сьӧлӧмӧ оз тӧр.
Став дойыс мунігкості бурдӧ,
Но регыд вошӧ чарӧм йӧр.

Лӧнь асъя шонді синсӧ восьтӧ,
Пыр вывлань лэптӧ ассьыс юр.
Ме ньӧжйӧ муна козъяс костӧд —
Мед кодзув тальыштны оз сюр.

Пӧсь руӧн лолыштӧны пуяс,
И менӧ чарӧм оз нин кут.
Ме корся вӧрысь петан туйӧс
И небзьӧм лым вылӧ ог сувт.