ЧУЖАН МУЛЫ

Оз тыдав тэнад пом ни дор,
Лӧз пармаа, лӧз юа муӧй,
Но мекӧд тӧдмасис быд шор,
Быд туйкӧд вевся менам туйӧй.

Ме нэм чӧж тэкӧд овны дась —
Мед эськӧ кывны лов шы тэнсьыд.
Оз вӧтлы гожся гебйыд тась.
Ни тӧвся турӧбыд оз дӧнзьӧд.

Ог повзьы киӧ босьтны зыр —
Мед туйяс вывсьыд зыртны лымсӧ.
А тэысь бокын овны дыр
Бать-мам эз сетны меным вынсӧ.

Оз кӧдзӧд менӧ кынмӧм му —
Ме сывда сійӧс аслам лолӧн.
Кӧть вӧтлан — тэ дорысь ог мун.
Ог аддзы тэтӧг шуда олӧм.

Тэ менӧ чужтін, сетін вын,
Тэ шуин менӧ аслад пиӧн.
И кытчӧдз сьӧлӧм оз ло кын —
Ме тэ дор мӧвпъясӧн и киӧн.