ШОЙЧЧАН ЛУН

Бур удж бӧрын бара воис шойччан лун.
Мыйла сӧмын миян вошӧ асъя ун?
Кодкӧ вӧрӧ кайӧ вотны пув да тшак,
Кодкӧ лӧсьӧдӧ со чери кыян сак,
Кодкӧ домӧд йылысь лэдзӧ кыйсян пон, —
Быд морт ас ног шойччан лунлы пуктӧ дон.
Быд морт аддзӧ аслыс медся мусатор:
Джуджыд вӧр ли, паськыд ю ли, визув шор...
Кодкӧ сьылӧ, кодкӧ йӧктӧ, — вӧчӧ гаж;
Кодкӧ книга дорын лунсӧ кольны дась.
Кодкӧ муса нывлы мойдӧ лӧсьыд мойд,
Виччӧ: дыр-ӧ нылыс муслунӧн оз ойд.
Кодкӧ гижсьӧ — босьтӧ аслыс гӧтырпу...
Майбыр абу ичӧт миян чужан му!
Абу этша сэні том и пӧрысь йӧз.
Быд морт уджалӧ, кыдз кужӧ, квайт лун чӧж.
Шойччыны, дерт, шойччан лунӧ абу лёк:
Шойччӧг корӧны сэк юр, и ки, и кок.
Сӧмын узьны шойччӧм могысь морт оз вод,
Узьӧм помысь миян нинӧм бур оз сод.
Кывзы бура миянӧс тэ, муса друг:
Узьысь морткӧд ассьыд шойччан лун эн юк!