ЛЕНИН ЙЫЛЫСЬ

Ичӧт на ме вӧлі
Сэк, кор Ленин куліс,
Йӧзкӧд ӧттшӧтш бӧрді...
Мамӧй меным шуліс:
«Бӧрдышт, пиӧй, бӧрдышт,
Тайӧ лун эн вунӧд.
Мортыд абу кӧртысь,
Сьӧлӧм абу сюмӧд.
Батьӧн вӧлі сійӧ
Миян кодь гӧль йӧзлы.
Югыд гажа биӧн
Сылӧн олӧм ӧзйис.
Аттьӧ ставӧн шуам
Ставсьыс талун сылы.
Сьӧлӧм пиын нуам
Пемыд шогсӧ тырыс.
Аддзывны — эг аддзыв,
Сёрнитны — эг сёрнит,
Ӧдйӧ олӧм гартчӧ;
Ӧні, пиӧй, сёр нин...
Сӧмын, век жӧ, вӧлі
Медся матыс мортӧн.
Менсьым олӧм тӧдіс,
Шуд мен вайис гортӧдз.
Кӧть и море ылын,
Кӧть оз тыдав тасянь, —
Кылӧ лов шы сылӧн,
Кымӧр вайӧ васӧ.
Он кӧ, пиӧй, вунӧд,
Кутшӧм вӧлі Ленин, —
Кытчӧ кӧть тэ мунан,
Сьӧкыдлунсӧ венан.
Он ло бызгысь-больгысь,
Он ло йӧзлы уджа.
Шудсӧ аслад ёртлысь
Дорйыны тэ кужан».
________

Визувтӧны юяс,
Визувтӧны шоръяс...
Прӧйдитӧны лунъяс,
Прӧйдитӧны вояс...
Дерт, эз вунлы Ленин...
Югыд образ сылӧн
Сьӧлӧм пиын менам
Ӧнӧдз олӧ-вылӧ.
_________

Батьӧн вӧлі Ленин...
И странаын миян
Уджалӧны ӧні
Сылӧн нывъяс-пиян.
Ныв-пи сы ног олӧ.
Ныв-пи сы ног вӧчӧ;
Оз тӧд уджысь полӧм,
Оз тӧд шоглы сетчӧм;
Ыджыд морт, кӧть ичӧт, —
Ӧтув олӧ йӧзкӧд,
Жеблы кисӧ мыччӧ,
Олӧм туйыс веськыд;
Медым чужан муным
Шонді моз жӧ ӧзъяс,
Коммунизмӧ мунӧм
Нӧшта ёнджык ӧддзас.
Ленинӧс моз батьӧн
Сэтшӧм мортӧс шуам,
Коді йӧзлы счастье
Сьӧлӧм пиас нуӧ.
Ветлӧ кӧ директор
Уджалысь йӧз дорӧ,
Подхалимӧс йӧткӧ,
Честнӧй мортӧс корӧ,
Пӧрысьлы и томлы
Колан сёрни аддзӧ;
Петкӧдлӧ, кыдз овны, —
Сылы мисянь аттьӧ!
Тырыс йӧз райкомын,
Могӧн локтӧ быдӧн;
Тані абу томан
Асылын ни рытын.
Секретар оз вунӧд,
Коді, кыдзи олӧ;
То колхозӧ мунӧ,
То заводӧ волӧ...
Быд морт тӧдса сылы,
Быд морт сійӧс тӧдӧ;
Кыдзи батьсянь пилы,
Сысянь отсӧг шедӧ.
Морт министрӧдз воӧ,
Но оз лэпты нырсӧ:
Плӧтниккӧд тшӧтш сёйӧ
Да печниккӧд пывсьӧ;
Сьӧкыдысь оз сайлась,
Орччӧн йӧзкӧд мунӧ,
Ачыс ветлӧ няньла...
Ленинӧс оз вунӧд.
Батьлы моз жӧ сылы
Уваженньӧ мисянь,
Эскӧмлун оз чинлы:
Йӧзлы шудыс сысянь.
__________

Овлӧ на и тадзи:
Мортыс, быттьӧ, синтӧм,
Некодӧс оз аддзы,
Ловнас йӧзӧс кынтӧ, —
Весиг боксянь яндзим.
Тӧдӧ сӧмын асьсӧ,
Гӧтырсӧ да писӧ:
Дасьтӧ ӧтка счастье,
Дзебӧ вына кисӧ.
Сылӧн кабинетас
Ленинлӧн портретыс,
Партбилет эм зептас...
Сӧмын, мый нӧ сэтысь,
Куш кӧ сьӧлӧм бердыс!
Татшӧм мортлы тшӧктам
Асьсӧ дзикӧдз вежны,
Мед не кольны ӧткӧн,
Ёртӧн лоны йӧзлы.
Ленин йылысь сёрни
Талун пані сійӧн —
Мед ми кужим лоны
Сылӧн нылӧн-пиӧн.