ЛЫМ

Лымйыс оз тэрмась,
А син водзын содӧ —
Войвывса тӧлыслысь
Могмӧдӧ мог.
Лэбалӧ сынӧдын,
Кок улӧ водӧ,
Гажӧдӧ ывласӧ
Быдсяма ног.

Лэбалӧ сынӧдын,
Лэбалӧ-ворсӧ,
Весиг оз казявлы —
Лун али вой.
Быттьӧкӧ кодӧскӧ
Тӧдмасьны корсьӧ,
Быттьӧкӧ вокъяссӧ
Аддзӧма чой.

Кокньыдик бордъяснас
Чужӧмад инмӧ,
Ӧтарӧ-мӧдарӧ
Катласьӧ дыр.
Дзирдалан югӧръяс
Шыблалӧ синмӧ,
Мелілун сылӧн
Быд вӧрзьӧмын тыр.

Гӧгралӧ гӧгӧрыд,
Выліад ӧшйӧ,
Быттьӧкӧ гажтӧмтчӧ —
Ӧтнас оз ов.
Вӧвлытӧм мичлунсӧ
Ассьыс тэд вӧзйӧ —
Тэ кындзи мӧд
Сылы некод оз ков.

Паськӧмӧ кутчысьӧ,
Керкаӧ пырӧ,
Корсьӧ выль оланін,
Корсьӧ выль шуд.
Шоныдкӧд окасьӧ,
Шоналӧ — бырӧ;
Нинӧмӧн сійӧс
Он дорйы, он кут.

Кӧтасьӧм кӧмкот
Да кӧтасьӧм кепысь,
Кӧтасьӧм шапка
Да кӧтасьӧм шаль, —
Сӧмын и аддзылан
Сы бӧрын сэтысь...
Лым чирйыс некодлы
Абу нин жаль.