КНИГА

Самолётыд — абу дивӧ,
И ракета — ӧні ас.
Регыд быд планета дінӧ
Ыстам мулысь кырымпас.

Медся ыджыд дивӧ светас —
Быдтор гижны кужанлун:
Мый кӧть вежӧр мортлы сетас,
Нинӧм войтырлӧн оз вун.

Любӧй дозмук вермас письтны,
Вермас тшыкны видзантор.
Мӧвпъяс некыдз дозйӧ кисьтны,
Кӧть тэ дозсӧ кӧртысь дор.

Видзны мӧвпъяс сӧмын вермӧ
Книга помтӧм уна кад.
Некор книгаӧн он йӧрмы,
Быд морт книгаыдлы рад.