ИЧӦТ ЧОЙ

Менам чойӧй ичӧт-ичӧт —
Оз на кокйыв весиг сувт,
Сӧмын кабыръяссӧ мыччӧ,
Кокнас чужйӧ: тувк да тувк.

Позяс терпитыштны кучкӧм,
Кокнас чужйӧмысь ог вись,
Оз кӧ бӧрд да олас лючки —
Оз кӧ ньылав дӧрӧм кизь.

Менам чойӧй ичӧт-ичӧт,
Сійӧ сёрнитны оз куж.
Сӧмын бӧрдӧ — быттьӧ видчӧ,
Кӧсйӧ петкӧдлыны «пуж».

Бӧрдӧм терпитны на позяс,
Сылӧн скӧрлунысь ог пов,
Оз кӧ пасьтӧдігӧн водзсась,
Оз кӧ усяв, кыдз оз ков.

Менам чойӧй ичӧт-ичӧт,
Сійӧ нинӧм оз на тӧд,
Сӧмын сы вылӧ и видзӧд,
Сылы сьыв да сыкӧд бӧрд.

Позяс видзӧдны сы вылӧ,
Позяс сьывны сьыланкыв,
Оз кӧ кыскы менӧ ывла,
Ог кӧ челядь гӧлӧс кыв.