КОМИ МУ

Коми автономиялы
сизимӧд во тыран лун кежлӧ.

І.

	Пуясыс йывъяснас кымӧрсӧ нюлӧны;
	Тӧв ныркӧд вензигӧн ньӧжйӧник шулӧны:
	«Дыр на ми сулалам, дыр...
	Коми му миянӧн тыр».
	Черияс гажаа ва пытшкын ворсӧны;
	Лэбачьяс быдлаын, быдлаын горзӧны...
	Юяслӧн визулыс лӧнь, — 
	Вералӧ налӧн лӧз вӧнь.
	Тундраын вой тӧлыс шутьӧбӧн ветлӧдлӧ,
	Вой море шызьӧма — збойлунсӧ петкӧдлӧ.
	Тундраын зэв уна кӧр...
	Олӧмыс сэтӧні скӧр.
	Коми му пытшкӧсыд быд бурӧн тырӧма,
	Му пиӧ озырлун зэв уна пырӧма,
	Озырлун другӧн оз быр — 
	Заводъяс вӧчалам тыр.
	Коми йӧз ӧтвылысь Рочмуса войтыркӧд
	Дорӧны выль олӧм сьӧлӧмсьыс, ойбыртӧг.
	ЭСеСеР — вынйитӧд ён...
	Тӧдамӧй сылысь ми дон.

ІІ.

	Эз на ӧд, вокъясӧй, вун,
	Кыдзи ми олімӧй важӧн:
	Олім ми сьӧкыд удж гажӧн,
	Пессимӧй, мырсим быд лун.
	Уджалан, висьӧ ён сой...
	Тӧв шӧрӧдз тырмывлӧ няньыд:
	Тшыгъялӧ семьяыд, чаньыд...
	Олӧмыс тэнад — сьӧд вой.
	Киссьӧма сукман и кӧм,
	Он вермы кыпӧдны овмӧс,
	Вотъястӧ мынтыны ковмӧ, — 
	Быдлаӧ колӧ ӧд сьӧм.
	Войнаяс вӧчалӧ сар;
	Мунан тэ пӧсь виртӧ кисьтны...
	Ранитчан, кутан тэ висьны,
	Буртӧ тэд некод оз кар.

ІІІ.

	Ӧшиньӧ таркӧдӧ кӧдзыд зэр скӧрысь,
	Вой тӧлыс омлялӧ нора...
	Шувгӧмыс пуяслӧн кылӧ сьӧд вӧрысь,
	Шоръясыс ызгӧны гора.
	Бикинь моз паськаліс, — выль юӧр воис,
	Арыд тай кутны эз вермы:
	„Озыр власьт бырис пӧ, — выль власьт нин лоис“, — 
	Чардби моз разаліс сёрни.
	Югнитіс кымӧръяс костӧдыс шонді,
	Шпыньмуніс голь йӧзлы яра.
	Советыд быд сиктӧ воссьыны пондіс,
	Олӧмыс мӧдӧдчис гора.
	Венсисны коми йӧз еджыдкӧд ёна, — 
	Кисьтісны власьт понда вирсӧ.
	Сійӧ ӧд гӧль йӧзлы быдторйысь дона...
	Озырӧс кок улас чирсӧ.

ІV.

	Нюмъялӧ ваыс, шпыньялӧ вӧрыс,
	Радлӧны пӧтка да звер.
	Кыпъялӧ рада Коми му шӧрыс — 
	Оз нин ӧд киссьы сьӧд зэр.
	Шонділӧн югӧрыс синъястӧ ёрӧ,
	Вералӧ сикӧтш моз ю...
	Коми йӧз пессьӧ — выль олӧм дорӧ, — 
	Вынмӧдӧ ас Коми му.
	Выльногса олӧм водзсасьӧ важлы,
	Туй шӧрысь йӧткалӧ пыр.
	Сетам жӧ туйсӧ сылы да гажлы, — 
	Лёкатӧ олім нин дыр.
	Шонді моз кыптӧ Комилӧн олӧм,
	Ньӧжйӧник писькӧдӧ туй.
	Путкыльтны важсӧ, — пасьйыны колӧ,
	Миянлы сійӧ оз туй.

V.

	Водзӧ жӧ тувччалӧй вӧр парма костӧд,
	Эн воштӧй ордымлысь визьсӧ.
	Вӧр туйсӧ паськӧдӧй, водзӧ пыр восьтӧй,
	Ковмас кӧ, кералӧй изсӧ.
	Бырӧдӧй пемыдлун, — велӧдчӧм ковмас, — 
	Тӧдӧй ті Ленинлысь кывсӧ.
	Кыпӧдӧй, бурмӧдӧй, ёнмӧдӧй овмӧс:
	Ӧтвылысь кыскӧй ті тывсӧ.
	Муыд мед тырмымӧн сёянтор сетӧ;
	Няньӧн мед тырӧма йӧртӧд.
	Пармаысь вӧр туйӧд сьӧлӧмысь петӧй, — 
	Шыбитӧй синъяссьыд кӧртӧд.
	Ас вынӧн, сьӧлӧмӧн шудлунсӧ перъям,
	Коми му быдторсӧ сетас.
	Выль туйсӧ веськыдӧс, шыльыдӧс бӧръям — 
	Коми йӧз пармаысь петас.
	Пабрикӧн, заводӧн Коми му тырас;
	Нюжалас кӧрт туйлӧн киыс.
	Пемыдсӧ весалас — быдлаӧ пырас
	Вужвыйӧн Ленинлӧн биыс.