* * *

	Вокъяс! Мед полысь оз повзьы,
	Пельпомӧн орччасям ми!
	Вынмӧдчы, уджалысь, ловзьы,
	Сьӧлӧмад ломзьӧ мед би!

	Сувтісны гӧль йӧзкӧд воча
	Ставыс, код озырӧн пӧт,
	Ставыс, код уджалӧ шоча,
	Ставыс, код нужа оз тӧд.

	Дум вылас босьтісны найӧ
	Важ ногӧн вӧчны быд став,
	Бергӧдны гӧльӧс ас сайӧ,
	Мырддьыны му, видз и дав.

	Мед эськӧ налы, кыдз важӧн,
	Бара на нартитны йӧз,
	Овны мед гырыся, гажӧн,
	Гӧгӧртны гӧль гӧгӧр вез.

	Озырлӧн важыс оз вунӧдчы, вокъяс...
	Чӧскыда гырыся олӧм оз вун, —
	Налы ӧд ӧні оз весавны кокъяс,
	Лёкысла налӧн ӧд бырӧма ун.

	Да ӧд и коньӧрлӧн дум вылас важыс!..
	Кӧн тіян вӧлі сэк узьӧм и пӧт?
	Коркӧ нӧ колльывлід во помсӧ гажӧн?
	Шуд лунъяс вӧлі не вемӧс, а вӧт...

	Вунӧдід, гашкӧ, кыдз тіянлысь олӧм
	Потшлісны нужаӧн, кодӧс он вудж?
	Кодкӧ мый артавліс тіянлысь колӧм?
	Коркӧ кӧть чинлі-ӧ тіян сьӧд удж?

	Весасьны ӧні став лёк сійӧ пондіс,
	Толькӧ ӧд кыскӧны бара на бӧр,
	Озырлысь силасӧ Англия кондіс...
	Жеб на ӧд миян ас вӧля да нэр.

	Гашкӧ ті, вокъяс, и асьныд сідз кӧсъяд?
	Чайтанныд босьтны сэсь нянь-сов да шуд?
	Ӧвсьӧй, ӧд ассьыныд горттӧ ті лӧсъяд,
	Пеклялы сьыліад пудъялад пуд...

	Медтыкӧ няньыс кӧть ворокыс шедӧ,
	Петкӧдлас озыр сэк воля да туй,
	Кусыньтас тіянӧс, сідзи и тӧдӧ, —
	Нэм кежлӧ сийӧсӧ пельпомтӧ сюй!

	Али нин быри удж бертысьлӧн вын? 
	Оз-ӧ мый вермы нин лэптысьны паныд?
	Лӧж сійӧ, вокъяс! Кыдз тӧв вӧтлӧ тшын,
	Сідз жӧ и вошӧны, сувтад кӧ ставныд.

	Водзӧ, тӧварышъяс! Матын нин пом!
	Регыд нин югыд да шуд олӧм воссяс!
	Смелджыка водзмӧстчӧй пӧрысь и том!
	Раз-пельтӧг, ӧтув! Мый корсяд, сэк босьтсяс!