М. Н. ЛЕБЕДЕВ ЙЫЛЫСЬ ПАСЙӦД


П. Доронин «М. Н. Лебедевлӧн творчество» статьяын, кодӧс йӧзӧдӧма «Войвыв кодзув» журналлӧн тавося 1-ой номерын, вайӧдӧ уна фактическӧй материал, пыдісянь да паськыда восьтӧ М. Лебедевлысь творческӧй туйсӧ.

Аслам пасйӧдын ме кӧсъя мыйсюрӧ содтыштны да стӧчмӧдыштны. Ме син водзын муніс М. Н. Лебедевлӧн комиӧн гижны заводитчӧмыс, тайӧ туй вылын медводдза воськовъясыс. Коми литераторъяс пӧвстын, меысь кындзи, некод нин абу ловъя, коді помнитӧ сійӧ кадсӧ, кор революция бӧрын выльысь юрӧбтісны Лебедевлӧн гора кывбуръясыс.

Кор босьтчис гижны Лебедев комиӧн? Медводдзаысь петіс сылӧн печатьын 9 кывбур 1914 вося фольклорнӧй сборникын. Тайӧ сборникыс — «Коми мойдан да сьылан кывъяс», чукӧртіс А. А. Цембер. Сборникас пасйӧма: «Ыджыд чери да ичӧт чери» да «Коми збойлун» гижӧма 1913 воын, «Озыр морт, купеч морт» — 1914 воын. Мукӧд кывбуръяс улас абу пуктӧма некутшӧм дата. Ми ог тӧдӧй, мыйла абу пасйӧма датасӧ. Позьӧ чайтны, мый тайӧ кывбуръяссӧ сійӧ гижӧма водзджык, гашкӧ, 1911–1912 воясын. Помнитсьӧ, 1913 воын миянлы, Тотьмаса учительскӧй семинарияын коми велӧдчысьяслы, Нёбдінса учитель А. А. Маегов мӧдӧдіс Лебедевлысь кымынкӧ кывбур («Гажа тулыс воис», «Ытшкандыр» да с. в.). «Ыджыд чери да ичӧт чери» кывбур улын вӧлі примечание, кӧні гӧгӧрвоӧдӧма манифест кыв: тані пӧ сёрниыс мунӧ «1905 во октябрь 17 лунся манифест» йылысь. Лебедев Ыджыд черинас да Ичӧт черинас аллегорически висьталӧ озыр да гӧль йылысь, а оз роч йӧз йылысь да коми йӧз йылысь, кыдзи кодсюрӧ вӧлі гӧгӧрвоӧмаӧсь. Да и ачыс Цемберыс невернӧ жӧ вӧлі гӧгӧрвоӧма тайӧ аллегорическӧй кывбурыслысь идеясӧ, сы вӧсна кывбур помас содтӧма бӧрынджык нин ассяньыс татшӧм строфа:


Сирыс абу роч йӧз,

Кельчи абу коми;

Вӧльнӧй светыс паськыд,

Ставным сэтчӧ тӧрам.


Революция бӧрын Коми рытъяс нуӧдігӧн тадзи вӧлі помавлӧны Лебедевлысь кывбурсӧ декламируйтӧм.

Кыв-мӧд колӧ шуны М. Лебедевлысь кывбуръяссӧ йӧзӧдӧм йылысь. 1918 воын менам киӧ веськавліс архивнӧй материал, кӧні вӧлі Цембер да Лебедев костын гижасьӧм. Менам ӧні на тӧд вылын татшӧмтор. Лебедев гижӧ Цемберлы: тэ пӧ полан печатайтны менсьым «Ыджыд чери да Ичӧт чери» да «Коми збойлун» кывбуръясӧс; мыйла пӧ полан, центральнӧй печатьын пӧ ӧні не татшӧмторъяс печатайтӧны да с. в. (Коли эз кӧнкӧ архивъясын тайӧ гижалӧмыс? Колӧ корсьлыны коми литературоведъяслы.) А гижасьӧмыс петкӧдлӧ, мый М. Лебедев 1913 воясӧ вӧлі тӧдса прогрессивнӧй идеяяскӧд, кодъяс петкӧдчылісны Россияса центральнӧй печатьын. Та йылысь жӧ висьталӧ и революционнӧя мӧвпалысь А. А. Маеговкӧд ёртасьӧмыс.

А. Цемберӧн лэдзӧм книгасӧ ме вуджӧді роч кыв вылӧ Тотьмаса учительскӧй семинарияысь преподаватель Н. В. Ильинскийлы. Сійӧ гижис рецензия Цембер книга вылӧ, кодӧс вӧлі йӧзӧдӧма «Известия Вологодского общества изучения Северного края» журналын, 1915 воын. Рецензияыс помасьӧ татшӧм кывъясӧн: «А. А. Цемберлӧн уджыс зэв колана, и не сӧмын коми морт висьталас аттьӧ кыв авторыслы вочасӧн бырысь народнӧй творчество видзӧмысь». Лебедевлысь кывбуръяссӧ рецензентыс шуӧма йӧзкостса сьыланкывъясӧн.

Колӧ стӧчмӧдыштны М. Н. Лебедевлысь революция бӧрын гижны босьтчӧмсӧ. 1918 вося ноябрын уездса народнӧй образование отдел бердын котыртчис Коми комиссия, кодлӧн могыс вӧлі лӧсьӧдны коми школалы книгаяс, сӧвмӧдны коми литература. Ме вӧлі тайӧ комиссияас член, а бӧрынджык сэсся секретарь. Комиссияыс шыӧдчис М. Лебедев дінӧ, корис сылысь комиӧн гижӧм кывбуръяс да мукӧд гижӧдъяс. Заказ вӧчлім сылы гижны школьнӧй хрестоматия.

Медводз сійӧ мӧдӧдіс миянлы «Зарни чукӧр» нима мойдкыв. Ми сійӧс лыддим Комиссия заседание дырйи. Вӧлі морт дас (Комиссияса членъяс кындзи волывлісны тшӧтш Сыктывкарса учительскӧй семинарияын велӧдчысьяс). Тшӧк ланьтӧмӧн кывзім мойдсӧ, мичлуннас нимкодясигтырйи. Сэсся регыд, сійӧ жӧ воас (1918) Лебедев ыстіс «Коми му» кывбур. (П. Доронинлӧн статьяын шуӧма: тайӧ кывбурсӧ пӧ вӧлі печатайтӧма Цемберлӧн сборникын. Тайӧ невернӧ.) Тайӧ гимн кодь кывбурсӧ лыддьӧм бӧрын кыпыдджык да долыдджык лои сьӧлӧм выланым, воссис син водзаным югыд нюкӧсыс, кыті визувтыштіс нин коми поэзиялӧн сӧдз ваыс. Регыд мысти сэсся Коми комиссияын кыліс гажа серамыс да гора кывбурыс Нёбдінса Витторлӧн. Татшӧм вӧлі коми сӧветскӧй поэзиялӧн медводдза воськовъясыс. Тайӧ кадса М. Н. Лебедевлы колӧ сетны медся почётнӧй места.

М. Лебедев гижис и прозаӧн. Сійӧ лӧсьӧдіс 1918 воын первой да мӧд класслы лыддьысян книга. Меным зэв сьӧлӧм вылӧ воис тайӧ книгаыс, но Коми комиссия мыйлакӧ эз примит сійӧс. В. А. Молодцовлы эз кажитчы книгаыс. Лебедев та бӧрын лӧгасис да нинӧм эз кут ыстыны Комиссиялы. Да и ме 1919 вося мартын муні фронт вылӧ, вошті йитӧдсӧ Коми комиссиякӧд.


1961


Гижысь: 
Гижӧд
М. Н. Лебедев йылысь пасйӧд
Йӧзӧдан во: 

lkejrlkelkrgner klrjnelknfrkl ekjnrjkenfrej

1