КОМИ ПОЭЗИЯ ВЕНГРИЯЫН

Таво петіс Венгрияса Сегед карын «Тисатай» журналлӧн мӧд номер. Номерсӧ ставнас сиӧма финно-угор кывъяс вылын гижӧм литературалы. Петер Домокош гижӧма вель ыджыд водзкыв, кӧні дженьыдика висьталӧ финно-угор народъяс йылысь, налӧн литература йылысь да сетӧ некымын поэтлы ичӧтик характеристика. Сэсся вайӧдӧ пӧшти быд финно-угор народлысь кывбуръяс да висьтъяс венгерскӧй кыв вылӧ вуджӧдӧмӧн.

Журналыслӧн тайӧ номерас вичмӧдӧмаӧсь коми поэзиялы 9 лист бок (43–51 лист бокъяс). Пырӧмаӧсь сэтчӧ татшӧм кывбуръяс да висьтъяс: «Тшап ныв йылысь сьыланкыв» (Колваса ненецкӧй эпосысь), И. Куратовлӧн «Коми кыв», «Коми бал», «Та пельӧсӧ регыд...», М. Лебедевлӧн «Мича ныв», Илля Васьлӧн «Доддьын», А. Ванеевлӧн «Куратовлы» да «Войвылын усьӧ лым» (тайӧс авторыс сиӧма Фокош-Фукслы — коми кыв тӧдмалысь ыджыд венгерскӧй учёнӧйлы), Г. Юшковлӧн «Мамӧй», Тима Веньлӧн «Кер пӧрӧдӧм», коми-пермяцкӧй гижысь В. Баталовлӧн висьт.

Унджык кывбурыслы вӧчӧма подстрочник Карой Редеи, а сэсся сы серти венгерскӧй кыв вылӧ вуджӧдӧма талантливӧй венгерскӧй поэт Геза Кепеш. Артмӧмаӧсь зэв мича да мыла кывбуръяс да висьтъяс.

Колӧ висьтавны ыджыд аттьӧ Карой Редеилы, Петер Домокошлы (найӧ кыкнанныс вӧліны Коми муын) да кывбуръяссӧ венгерскӧй кыв вылӧ вуджӧдысьяслы.

1972