«СТЕНЫСЬ БЕРДӦ ВЕТЛӦДЛЫНЫ»


Кор ми кӧсъям висьтавны немуджтӧм морт йылысь, коді оз тӧд, кыдзи коллявны кадсӧ, кутшӧм уджӧ босьтчыны, миян юрӧ воӧ зумыд кывтэчас: стенысь бердӧ пӧ ветлӧ. А син водзӧ сувтӧ серпас: морт весьшӧрӧ жӧдзӧ жырйын ӧти стенсянь мӧдӧдз. Тайӧ кывтэчасас (идиомаас) гӧгӧрвотӧм кольӧ ӧтитор: мыйла бердӧ кывворсӧ босьтӧмаӧсь ӧткӧн, сы водзын абу сувтӧдӧмаӧсь существительнӧй либӧ местоименньӧ.

Мед тӧдмавны йӧзкост сёрнилысь тайӧ гусяторсӧ, колӧ пырӧдчывлыны кыв историяӧ. Коми сёрниӧ стен кыв веськаліс рочысь. Войдӧрджык, рочьяскӧд волысьтӧдз, миян пӧльяс да пӧчьяс стенсӧ нимтылӧмаӧсь ас кывйӧн, коді вӧлӧма финн-угор подув кывйын на. Комиӧ тайӧ стен вежӧртаса кывйыс кольӧма сӧмын берд кывбӧр пыдди, венгерскӧйын коми берд-лы лӧсялӧ раrt — берег, ва дор; места, кытчӧ инмӧ ваыс. Берег да стен тӧдчанлун боксяньыс матыса кывъяс, ӧтиыс кутӧ ва, мӧдыс — керка.

Удмурт кывйын стенсӧ шуӧны бордӧн. Сэні керка стен пыдди шуӧны: корка борд, стенгазет пыдди — бордгазет. Тӧд вылын колӧ кутны сійӧтор, мый удмурт кывйын коми э-лы векджык лӧсялӧ о. Орччӧдӧй:

коми: зэр, кер, керка, петны, сетны, менӧ, тэнӧ;

удмурт: зор, кор, корка, потыны, сётыны, монэ, тонэ.

Венгерскӧйын гортӧм согласнӧйяслы вермӧ лӧсявны комиын гора и мӧдарӧ. Орччӧдӧй:

коми: байдӧг, тури, джек, берд

венгр.: faіd, daru, szek, part и с. в.

Рочысь стен кыв босьтӧм бӧрын коми сёрниын берд кыв вочасӧн кутіс вежны тӧдчанлунсӧ — петкӧдлыны действие мунанін, а сэсся и вуджис кывбӧрӧ. Сійӧ ӧні служебнӧй кывсикас, кыдзи и улын да вылын, сайын да весьтын кывбӧръяс, кодъяс ас кадӧ артмӧмаӧсь асшӧр ув, выв, сай, весьт кывъясысь.

«Стенысь бердӧ ветлыны» идиомаыс миян сёрниын артмылӧма ёна важӧн нин, кор «стен» кыв заводитӧма нин пырны комиӧ, а «берд» кыв абу на удитӧма воштыны асшӧр вежӧртассӧ. Сэки найӧ вӧлӧмаӧсь синонимъясӧн, кыдзи и ӧні синонимъяс пыдди мунӧны вежӧс да комната, потан да зыбка, сюрс да тысяча, агас да пиня.


Гижӧд
«Стенысь бердӧ ветлӧдлыны»

lkejrlkelkrgner klrjnelknfrkl ekjnrjkenfrej

1