ТЭДЖЫК

Качественнӧй прилагательнӧйяслӧн да наречиеяслӧн сравнительнӧй степень артмӧ -джык суффиксӧн: ичӧт — ичӧтджык, пӧся — пӧсьджыка... Коми кывйын тайӧ суффиксыс вермӧ йитчыны и мукӧд кывсикасъяс дінӧ да этша кывйӧн (экономнӧя) петкӧдлӧ действиелысь, предметлысь, признаклысь степеньсӧ. Шуам: «Тэ талун кывзанджык» предложенньӧсӧ гӧгӧрвоам: тэ талун сюсьджыка кывзан. Этшаджык кывйӧн ми тӧдчӧдім сійӧ жӧ мӧвпсӧ, кор содтім -джык суффикс глагол дінӧ.

Улын сетӧм примеръяссӧ вежӧй сідзи, медым -джык суффикс сулаліс прилагательнӧйкӧд либӧ наречиекӧд. Ӧткодялӧй, коднан предложенньӧыс дженьыдджык да мичаджыкӧн артмӧ.

1. Питор мичаджык, кор велӧдчӧ,

Том бать батьджык, кодыр ноксьӧ пыр,

Кодыр артасьӧ да зэлӧдчӧ. (И. К.)

2. Калисакӧд олігӧн Никодим рытйысьліс гортасджык.

3. — Пирӧгтӧ нӧкйӧнджык сёй! — яналӧм Онтон Ӧксенӧс аслас кывъясӧн жӧ эльтыштіс Никодим.

4. А Тольӧыс мӧдджык думъясӧн олӧ: кольӧм во, кӧкъямыс класс помалӧм бӧрын, техникумӧ муніс.

5. — Ӧксен, тэджык! — шпынняліс Никодим. (В. Б.)

6. Ловзис ошкӧмысь Ардальон, шогыс эзджык кут йирны.

7. Арся кадӧ номйыс абуджык. Эзджык тырмы выныс кутшлы лэбӧдны сьӧкыд чериӧс, и кутіс пышйӧдны боквыв чеччышталӧмӧн. (Г. Ю.)

Воча кывъяс

1. Том бать — бурджык бать,

Кодыр ноксьӧ пыр...

2. Никодим тшӧкыдджыка рытйысьліс гортас.

3. Унджык ноктӧ сёй пирӧгнад!

4. Тольӧлӧн думъясыс ёнджыка торъялісны бать-мам кӧсйӧмысь.

5. Ӧксен, зільджыка кыскы асланьыд!

6. Ловзис Ардальон, шогыс этшаджык кутіс йирны.

7. Арся кадӧ номйыс этшаджык. Ичӧтджык лоис выныс кутшлӧн, эз вермы лэбӧдны сьӧкыд чериӧс.