КОМИ

 

Коми мортлы коми парма

Ёна лышкыдӧн эз вӧв:

Венан — озырмӧдас арнас,

Он кӧ — виньгырт гортад чӧв.

(Г. Ю.)

 

Быдӧнлы интереснӧ тӧдны, мыйла ми асьнымӧс шуам комиӧн, кыдзи артмылӧма тайӧ кывйыс.

Учёнӧйяс тӧдмалӧмаӧсь, мый ёна важӧн, вит-квайт сюрс во сайын, комияс абу на вӧвлӧмаӧсь кыдз торъя кывъя йӧз, а сэки вӧлӧма ӧтласа финн-угор кывъя войтыр, кодъяс бӧрын кутӧмаӧсь разӧдчавны и артмӧдӧмаӧсь ӧнія финн-угор семьяса йӧзӧс: венгръясӧс, финнъясӧс, карелъясӧс, эстонечьясӧс, мордваӧс, удмуртъясӧс, мариечьясӧс, хантыясӧс, мансиӧс, комиӧс тшӧтш.

Тайӧ йӧз сёрниын мужичӧйясӧс да ай пемӧсъясӧс нимтылӧмаӧсь войдӧр ӧти кывйӧн. Тайӧ кывйыс вӧлӧма -ком. Ӧні на миян асыввывса суседъяс — хантыяс — мужичӧйӧс нимтӧны комӧн: ханты ком — ханты мужичӧй, саран ком — коми мужичӧй, манси ног мужичӧй — хум: манси хум — манси мужичӧй, саран хум — коми мужичӧй. Венгръяс химӧн пасйӧны ай пемӧсъясӧс, шуам: хим кутё — ай пон, хим юх — ай ыж... Венгерскӧй кывйын коми к-лы кыв водзын лӧсялӧ х, ӧткодялӧй: коми: куньны, кызны, кыдзи, кӧ; венгерскӧй: хуньні, хизні, ходь, хо... Коми кывйыс артмылӧма ком кыв вужйысь да -и суффиксысь. Ӧні на финн-угор кывъясын, да и комиын, -и суффикс артмӧдӧ прилагательнӧйясӧс существительнӧйясысь. Шуам, венгерскӧйын: хаз — керка, хазі — керкаса; Будапешті — Будапештса, эстонскӧйын: коол — школа, коолі — школаса, Таллині — Таллинса.

Ӧні коми прилагательнӧйяс лыдысь ӧткымынӧн сідз жӧ артмӧмаӧсь тайӧ важъя -и суффиксӧн, шуам: ыл-і, бок-и, выл-і, мел-і, посн-и, векн-и да с. в.

Морт да мужичӧй уна йӧз сёрниын, оз сӧмын финн-угор кывъясын, пасйысьӧны ӧти кывйӧн, татшӧм ногӧн морт мужичӧйлы лоӧ синонимӧн: немецкӧйын — Маnn, английскӧйын — man, украинскӧйын — чоловік, ненецкӧйын — ненця, марийскӧйын — мари да с. в.

Кор разалісны финн-угор кывъя котырыс, миян пӧльяс асьнысӧ кутісны ыдждӧдлыны коми войтырӧн — морт чукӧрӧн... Важӧн ком кывйыс -и суффикснас мунлӧма сёрниын прилагательнӧй пыдди — вочавидзлӧма кутшӧм? вопрос вылӧ. И ӧні на ёнджыкасӧ сійӧ мунӧ признак петкӧдлысь кыв пыдди, шуам: коми морт, коми кыв, коми йӧз, коми му...

 

lkejrlkelkrgner klrjnelknfrkl ekjnrjkenfrej

1