ӦДӦСВОМ, ӦДӦСДІН
Бӧръяпом Коми муысь унакодь ичӧт сикт кушмис, туис вӧрӧн, эжсялісны налӧн вӧвлӧм паськыд ыбъяс.
Татшӧмъяс лыдӧ веськаліс и Ӧдӧсдін — Сосногорск районысь нэмӧвӧйся коми сикт. Сэтчӧ кыксё во сайын бурджык кыйдӧсаинъяс корсьӧм могысь волӧмаӧсь Висер вожысь: Сюзяыбысь да Висерысь Габовъяс, Подоровъяс, Игушевъяс.
Найӧ сывдылӧмаӧсь асланыс пӧсь лов шынас татчӧс кӧдзыд мусӧ, джуджыд Изьва кыр йылӧ лэптылӧмаӧсь зумыд ниа керъясысь шоныд керкаяс, весалӧмаӧсь пемыд вӧрысь видзьяс, рӧдмӧдӧмаӧсь мӧс-вӧв, ыж-порсь, чипан-петук.
Ӧдӧсдін сиктлы ассьыс «Ӧдӧсвом, Ӧдӧсдін, Одесдино» нима небӧгсӧ сиӧма Валерий Хозяинов.
Сӧвет власьт воясӧ Ӧдӧсдінысь ветлӧма чужан мунымӧс дорйыны 16 морт, на пиысь кызвыныс усьӧма вир кисьтана чорыд тышын. Фашистлы паныд повтӧг тышкасьӧмысь куим мортӧс пасйӧмаӧсь Отечественнӧй войнаса орденъясӧн, витӧс — медальясӧн.
Война воясӧ тылын бура уджалӧмысь, Сосногорск карса депоын вагонъяс дзоньталігӧн сьӧлӧмсянь зільӧмысь Трудӧвӧй Краснӧй Знамя орден вичмӧдлӧмаӧсь Прокопий Фёдорович Габовлы. «Пионер» колхозын война воясӧ бура уджалӧмысь 14 аньӧс козьнавлӧмаӧсь СССР-са медальясӧн.
Небӧг гижысь кужӧмӧн матыстчӧма Ӧдӧсдінын быдмӧм войтыр дорӧ. Найӧ сьӧлӧмсяньыс юксьӧмаӧсь сыкӧд казьтылӧмъяснас, ӧнӧдз видзӧмаӧсь 70 восайся война вылысь волӧм письмӧ-серакуяс.
Автор вайӧдӧ Вылыс Изьва посёлокын олысь Валентина Васильевна Жуковскаяӧн сетӧм кабала, кӧні аньлӧн батьыс — Василий Прокопьевич Габов, 1908 воӧ чужлӧм морт, гижӧ мамыслы — Матрёна Ивановналы — комиӧн. Тайӧ письмӧсьыс лыддьысьысьлы ӧвтӧ война кадся кӧрӧн.
Ӧдӧсдін сикт ӧні сулалӧ тыртӧм. Зумыд ниа керйысь тэчӧм кӧрӧминаяс пӧвйӧн тувъялӧм ӧшиняӧсь. Татчӧ волывлӧны сӧмын гожӧмнас вӧвлӧм олысьяслӧн пӧльӧн шуысьясныс да налӧн пияныс.
Сӧмын сэки ловзьылӧны эндӧм сиктса керка йӧръясыс. Та вылӧ индӧны фотокарточкаяс, кодъясӧс пыртӧма аслас казьтылана небӧгас мудз тӧдтӧг чужан мусӧ серпасалысь.
* * *
Водзмӧстчысь морт дас вит во нин ветлӧдлӧ Винла, Порожскӧй, Аким, Уквавом, Пожня сиктъясӧд, сёрнитӧ сэтчӧс олысьяскӧд, гижалӧ налысь казьтылӧмсӧ, лукйысьӧ важся гижӧдъясын, архивъясын.
Тадзи сылы дженьыд кадӧн мойвиис лэдзны тайӧ важся коми сиктъяс йывсьыс сизим небӧг.
