СӦДЗӦДӦМА АСЛАС ВЕЖӦР ПЫР

Нималана коми гижысьлы, Яков Митрофанович Рочевлы, таво тырис эськӧ 102 арӧс.

Талунъя коми литература оз ло тыр вир-яяӧн Митрук Яклӧн «Кык друг», «Изьва гызьӧ», «Му вежандыр» романъястӧг, сылӧн повесьтъястӧг, висьтъястӧг, очеркъястӧг, кывбуръястӧг.

Кор кылан тайӧ ыджыд сяма гижысь йывсьыс, син водзад сувтӧ морт, коді яръюгыда серпасаліс ылі войвывса олысьясӧс, коми да яран (ненеч) кӧр видзысьясӧс, му вӧдитысьясӧс, выль олӧм тэчысьясӧс, сійӧ кадколастсӧ, кор вежсис налӧн оласногныс.

Сӧмын на петӧм «Певец Печорского края» небӧгын Сосногорск районса Пожня сиктын быдмӧм морт, ас му радейтысь, журналист, «Заря Тимана» газетын зільысь В. И. Хозяинов туялӧма Яков Митрофанович Рочевлысь олӧмсӧ да гижан уджсӧ. Валерий Иванович ичӧтик чиръясӧн зільӧма чукӧртны нималана коми гижысь йылысь рӧдвужыслысь, ныв-пиыслысь, чожӧн да пӧльӧн шуысьясыслысь, гижан удж кузя томджык ёртъясыслысь: Егор Рочевлысь, Николай Щукинлысь, Александра Мишариналысь, Александр Некрасовлысь, Владимир Тиминлысь казьтылӧмъяссӧ. А сідзжӧ В. В. Юхнинлысь, Г. А. Фёдоровлысь, С. С. Раевскӧйлысь, С. А. Поповлысь «Югыд туйын», «Коми муын», «Войвыв кодзулын», «Красное знамяын» сы йылысь петавлӧм гижӧдъяс.

Аслас небӧгын Валерий Хозяинов шоныд да кыпыд рӧмъясӧн серпасалӧ Уквавомын да Сосногорскын нуӧдӧм Яков Рочевлы сиӧм ыджыд гаж, кӧні 2009 воӧ паськыда пасйисны гижысьлы 100 во тырӧмсӧ.

Валерий Иванович унатор сӧдзӧдӧма Митрук Яклӧн олӧмысь аслас вежӧр пырыс. Та вӧсна небӧгсӧ лыддян коставлытӧг. Митрук Як сувтӧ син водзад ловъяӧн, лышкыд сьӧлӧмаӧн. Сійӧ отсалӧ вермасьны ӧнія кадся сьӧкыдлунъяскӧд, корӧ лыддьысьысьӧс лоны сьӧлӧмаӧн.

Кыв шутӧг, В. И. Хозяиновлӧн «Певец Печорского края» уджыс лоас пызанвывса небӧгӧн школаын коми кыв да литература велӧдысьяслы, студентъяслы, ас кыв да чужан му радейтысьяслы.