АВТОБИОГРАФИЯ


Чужи ме 1909 вося апрель 14 лунӧ Тентюков сиктын.

Мам-бать менам вӧліны гӧль крестьяна. Бать став том кадсӧ вӧлӧма батракӧн, а мам быдмӧма сирӧтаӧн рӧдня ордас да джынвыйӧсӧ вӧлӧма батрачкаӧн жӧ.

Керка миян вӧлі зэв ичӧт. Тӧвся туй турӧб лунъясӧ вӧлі кыптас сідзи, мый вӧла мунігӧн ӧшинь пыр вӧлі тыдалӧны вӧвъяслӧн сӧмын подковъясыс. А тулысын да гожӧмын миян кодь бур керка этша вӧлі позьӧ аддзыны матігӧгӧрысь. Озырлуныс миян керкалӧн вӧлі «сад» — кык льӧм пу да кык пелысь пу. Тулыснас налӧн еджыд розъясӧн миян керка вӧлі тупкыссьӧ ставнас.

Велӧдчи ме Тентюков школаын, а сы бӧрын — Сыктывкарса ІІ ступеня школаын.

1923 воӧ, кор ме велӧдчи карын нин, ме пыри комсомолӧ, но эг школаса ячейкаӧ, а Тентюков сиктса ячейкаӧ. Сы бӧрын регыд менам арлыда комсомолечьяслы коли «наследство» — нуны культурно-просветительнӧй удж Тентюков школа бердын. Сэтчӧдз тайӧ уджсӧ зэв бура нуисны миянысь ыджыдджык арлыда том йӧз. Ог вермы шуны, уна-ӧ бурыс вӧлі миян уджысь йӧзлы, но асьнымӧс миянӧс, комсомолечьясӧс, тайӧ уджыс бура воспитайтіс.

1927 воӧ ме муні Перым карӧ да пыри велӧдчыны университетӧ. Велӧдчи ме физико-техническӧй отделенньӧын, а лыдди унджыксӧ поэзия йылысь книгаяс да важ поэтъяслысь произведенньӧяс. Медводдза стихотворенньӧяс, кытӧн вӧлі тӧдчӧ нин поэзиялысь законъяссӧ гӧгӧрвоӧм, ме гижи Перымын велӧдчигӧн. Сэки жӧ заводиті «Шыпичаӧс» гижны.

1931 восянь 1935 воӧдз велӧдчи Московскӧй государственнӧй университетын. Сэн ме вӧлі аспирантӧн. Нёль во ме пукті математика велӧдӧм вылӧ. Поэзия эновтлі дзикӧдз.

1935 воӧ ме вои Сыктывкарӧ да куті уджавны Коми пединститутын. Сэки ме бара босьтчи поэзияӧ. 1936 воӧ ме гижи поэма «Домна» да выльысь босьтчи гижны «Шыпича».

1938 восянь 1955 воӧдз уджалі Горькӧй карын, пединститутын, а 1955 восянь уджала Московскӧй Ленин ордена энергетическӧй институтын. Тайӧ карын ме гижи кымынкӧ лирическӧй стихотворенньӧ да помӧдз вайӧді ассьым медся ыджыд произведенньӧ «Шыпича».

Бӧръя дас воын поэзиялы верми вичмӧдны зэв этша кад сы вӧсна, мый уна кад ме пукті высшӧй математика велӧдӧм йылысь книгаяс гижӧм вылӧ.


Гижысь: 
Гижан кад: 

lkejrlkelkrgner klrjnelknfrkl ekjnrjkenfrej

1