ЭН ВУНӦД

Ог тӧд ачым, кыдзи артмис тайӧ...
Дӧзмин (нинӧм кӧть ме сэтшӧмсӧ эг шу),
Саялін тэ тшӧкыд пуяс сайӧ,
Лым вылын жӧ сӧмын лыжи туй.

Кыссьӧ туй. И дзорга ме сы вылӧ.
Морӧс шӧрын пессьӧ тӧдтӧм шог.
Саялін тэ, скӧрлун нуин, нылӧй,
Сэсся бӧр он бергӧдчы, он лок.

Муртса кывмӧн юалі ме тэнсьыд:
«Радейтан тэ менӧ али он?»
Ӧзйис тэнад синъясын сэк шензьӧм:
«Мый тэ? Эн, эн надейтчы тэ, зон...»

Йӧткыштчин тэ бедьясӧн. И ӧтнам
Сулала ме, ӧшӧдӧма юр,
Кӧть и жугыльлунӧс шонді вӧтлӧ,
Кӧть и мирыс сэтшӧм мича, бур,

Мый оз позь и овны сьыланкывтӧг.
Но эн вунӧд некор, вильыш ныв, —
Тулысыс лым вылысь туйтӧ сывдас,
Но ӧд менам сьӧлӧмысь оз сыв.