ЧОЛӦМ, ВЫЛЬ ВО!

ПЕРВОЙ ЛЫДДЬЫСЬ. 
Чолӧм, выльӧн чужӧм во, 
Вой шӧр войын чужӧм! 
Ачыд водзмӧстчысьнас ло — 
Ышӧднысӧ кужам.

МӦД ЛЫДДЬЫСЬ. 
Выльӧн чужӧм на кӧть, но 
Выныштчыны дась нин, 
Мед тэ гажтӧмӧн он ло, 
Гажсӧ лэптам асьным.

ПЕРВОЙ ЛЫДДЬЫСЬ. 
Асыв кыа пестӧ со — 
Сійӧ дзик выль вося. 
Сӧмын шудаӧн тэ ло — 
Нюмъялам тэд воча.

МӦД ЛЫДДЬЫСЬ. 
Паськӧд бордъястӧ да лэб 
Вӧльнӧй му-ва шӧрӧд, 
Сӧмын некодысь эн дзеб, 
Мый ми сяммим тӧрыт.

ПЕРВОЙ ЛЫДДЬЫСЬ. 
Кодлӧн бурсӧ тэчӧ лов, 
Йӧз шуд вӧсна пессьӧ, 
Сыкӧд ӧтвылысь тэ ов, 
Вермӧм перйы сэсся.

МӦД ЛЫДДЬЫСЬ. 
Восӧ восьтысь мича лун 
Сьыланкывйӧн тырӧ, 
Медым дзик некор эз вун, 
Сьӧлӧмъясӧ пырӧ.

ПЕРВОЙ ЛЫДДЬЫСЬ. 
Уджӧн радейтӧмӧн тыр, 
Рад ме бара шуны: 
Мед жӧ дзоридзалас пыр 
Муса Сӧвет муным!

КЫКНАННЫС ӦТЛАЫН. 
Миян зільӧмным оз вош — 
Пытшкӧсаным ӧзйӧ.
Мирнӧй воӧн ло, выль во — 
Татшӧм медпӧсь кӧсйӧм.

(Сьыланкыв либӧ йӧктӧм.)