МЕДЫДЖЫД ОЗЫРЛУНӦЙ МЕНАМ

Октябрь, кор лыйис тэнад гым,
Сэк важсӧ мустӧм рӧкыс суис,
Йӧз сьӧлӧмъясысь сыліс лым
И шудлань мӧдіс чужан муӧй.

А ме, Октябрь, сэк эг на-й вӧв,
Но шудсӧ сэк нин меным койин.
Нева ю дорсянь свежӧй тӧв
И татчӧ, Войвылӧ, тшӧтш воис.

Да, татшӧмтор эз сідз-тадз шед:
Ӧд арын кужис чужны тулыс.
Эз сэк мӧй выльлӧн кыа пет,
Код вежис бансӧ дона мулысь?

Эз сэк мӧй выльлӧн кыа пет,
Код ӧзйӧ миян гордӧй стягын?
И муӧдз копрасьӧны тэд
Дзор ниаяса Коми ягъяс.

Со талун грымакылӧ гым,
Кыдз сэки, нелямын во сайын:
Салютлӧн кыпыд, збодер шы
Быд помын кылӧ, дзик быд крайын.

Ме лёккӧд косьын ог ло ляб.
Ми тэкӧд быдтор вермам-венам.
Сӧветскӧй му да тэ, Октябрь, —
Медыджыд озырлунӧй менам.