ЮГЫД ШОНДІӦЙ...

Югыд шондіӧй, тулыс чужтысьӧй,
Веськӧд войвывлань мелі син.
Дойяс чинтысьӧй, шогъяс вуштысьӧй,
Шыбит морӧсам долыд кинь.

Югыд шондіӧй, водз-водз садьмысьӧй,
Ёна нюжӧдан гожся лун:
Ытшкан видз вылын тэкӧд аддзыся,
Куртан видз вылысь дыр ог мун.

Югыд шондіӧй, кывтан уліті,
Кодыр пӧльыштас ыркыд ар,
Но ог кӧсйы ме видны-кулитны,
Кӧть и абу тэ лышкыд ни жар.

Югыд шондіӧй, тӧлын кӧдзалан,
Дзебсян дыр кежлӧ, вошан дзик.
Джуджыд толаяс тыртан-вӧчалан,
Лымйӧн пырзьӧдан чужан сикт.

Югыд шондіӧй, миян Войвылӧ
Волы-ӧзъявлы, шаньӧн ло,
Коми шогнымӧс, коми дойнымӧс
Бурдӧд-шонты да гӧгӧрво.