* * *

Пӧсь радейтӧмсӧ видзи,
Но колис сӧмын дой.
А мыйла артмис сідзи,
Оз висьтав тувсов вой.

И мыжа ӧмӧй войыс?
И мыжа ӧмӧй кыдз?
Пӧсь радейтӧмыс воис,
Но кодлы могыс — кысь?

Зон видзӧдласнас сотіс,
Ныв сьӧлӧм сотчис тшӧтш,
Кор кыдз пу корйыс потіс,
Кор руаліс ю кӧдж,

Кор каля няргис-горзіс,
Кор пӧльтіс небыд тӧв,
Кор мудзис ёль ас горсьыс,
Кор тӧлысь кывтіс чӧв.

Ме радейтӧмлы эски.
Мем немтор эз вӧв жаль.
Но эз-ӧ зонмыс сэки
Бур шудсӧ ассьыс таль?

Ме сэсся-й вуні сылӧн,
Кыдз быттьӧ эг и ло, — 
Эз, зонмыс сьӧлӧм кылӧм
Эз ме ног гӧгӧрво.

Том кыдз пу дорын ӧні
Ме сулала рытсёр.
Виж коръяс гылалӧны — 
Дзик быттьӧ ковтӧмтор.