НИМКОДЯСЬТӦГ, ДЕРТ, ОГ ОВ
Мортыс, коді нэмсӧ мырсис тан, Локтысь шудсӧ серпасавліс мойдын. Но эз воштыв тшӧтш и серамбан Мытшӧдъяс пыр вуджысь миян войтыр. Ыджыд шудӧ эскӧмыс эз чин — Ломаліс век, тӧв вылын кыдз ӧгыр. Коркӧ-й Комиыдлӧн воссис син, Вӧлись лоис тыдалана гӧгӧр. Олан туйсӧ югдӧдіс роч вок, Да и ачыс комиыд век зілис. И кӧть ӧнӧдз вуджрасьлӧ на лёк, Зумыдлунсӧ важӧн ликтіс выльыс. Эз ӧд енмыс кокнилунсӧ сет, Быдторсӧ ми сьӧкыд туяд венім. И тыр лолӧн лолавсис тан мед, Вӧлісны и Партия, и Ленин. На пӧвстысь мед некод оз жӧ вун, Коді Сӧвет властьсӧ дорйис тані, Коді, мед эз чусав югыд лун, Вӧрӧгкӧд вир кисьтан косьсӧ паніс, Кодлӧн война биын орис нэм, Медым ладӧн овсис быд странаын... Дзик став бурӧ, олӧмас мый эм, Тӧдчымӧнъя пайсӧ пуктӧм наӧн. На йылысь ме вунӧдны ог лысьт Весиг талун, медся шуда лунӧ. Водзӧ нуам наӧн панӧм висьт. Долыд юӧр — водзын уна-уна. Ставыс сэтшӧм ас — и му, и ва. Ошкан кывсӧ сьӧлӧм шуны корӧ. Орден, кодӧн козьналіс страна, Быттьӧ югзьӧдіс и менсьым морӧс. Нимкодясьтӧг, чой-вок, дерт, ог ов, Но и сэтшӧм мӧвп на юрӧ волӧ: Йӧз водзас мед сӧстӧм вӧлі лов, Сы мында на вӧчны мен тшӧтш колӧ!
Гижӧд
Нимкодясьтӧг, дерт, ог ов
Жанр: 

lkejrlkelkrgner klrjnelknfrkl ekjnrjkenfrej

1