МИЯН ИЛЛЯ ВАСЬЛЫ

Эжва юӧ дзоргӧ Тэнад керӧс,
Кӧн Тэд коркӧ воссис олӧм гаж.
Чужан Тентюковлӧн зумыд серыс —
Быттьӧ визув нэмъяс видзысь страж.

Юбилей век ачыс аснас кыпыд:
Тӧдчӧдӧ быд воськовтлӧмлысь дон.
Тэнсьыд керӧс Эжваыд эз кырӧд,
Гож водзын и шер улын — век ён.

Сяммылін дай сямман кывтӧ шуны
Парма йӧзлы — сідзкӧ, тшӧтш и мем...
Уна нэм нин шуньгӧ Эжва юным,
Но, а мортыд олӧ ӧти нэм.

Сьӧлӧмнас кӧ мортыд эз на воймы —
Кыдзи вермӧ, ыдждӧдлӧ ас му.
Весиг юыс мортлӧн дойӧн доймӧ,
Сӧмын мортлӧн шудӧн шуда ю.

Садьмӧм йӧзкӧд ӧтвыв ветлӧ лолыд.
Сьӧлӧм зіль. И мӧвпӧн тырӧ юр.
Абу сэк куш ӧтнасыдлы долыд,
Абу Тэд куш ӧтнасыдлы бур.

Лёкыслы ми важӧн шулім: «Кеж вай!»
Шудыслы, кыдз ёртлы, мыччам сыв.
Асшӧр туйӧд водзӧ шлывгӧ Эжва,
Асшӧр туйӧд письтӧ сьыланкыв.

Кылӧ век Тэд: Эжва тёльскӧ гыӧн.
Сьӧлӧм сьылӧм чуктыны век дась.
Дыр на чуксась аслад сӧстӧм шыӧн,
Дыр на ышӧд, дона Илля Вась!