МЕДВОДДЗА ЗВӦНОК

Йиркыс больнича вежӧсын — 
Джуджыд, кыдз тӧдтӧм на енэж,
Еджыд-еджыд, кыдз выльӧн на
					сапкысьӧм лым.
Сӧмын мыйла нӧ енэжыс
				синкымӧс топӧдӧ-личкӧ?
Сӧмын мыйла нӧ лымйыс оз гажӧд,
				оз чиръяснас ворс?
«А вед медводдза звӧнокыд тайӧ...
Тайӧ медводдза звӧнокыд тэнад...» — 
Шуис невропатолог Чернова
Валентина Петровна мен тадз.
Шуис гортам на. Ӧлӧдӧ, сідзкӧ,
Мустӧм рӧкыс нин водзвыв и менӧ?
Йӧрмис шуӧмыс юр вемам, сибдіс.
Шӧйӧвошлікодь, дрӧгмунлі весиг:
Водз на таладор югыдсӧ кольны,
Бур йӧз водзас пыр уджйӧза ӧнӧдз...
«Микро...» — ассяньыс Фрида Ивановна
						шуис
Татӧн, больнича йирк улын, лӧня.
«Микро» кыв дінас висьмӧмлысь нимсӧ,
Дерт, латинскӧйӧн содтіс — вед врач.
И палатаын сынӧдыс стрӧгмыштіс здукӧн.
Но быд кималас, юрнас
			быд довкнитӧм сэк,
Менӧ синъяснас шобӧмыс
			восьтісны бура
Менам докторлысь шаньлунсӧ,
				эскӧдан русӧ,
И палатаӧ тювгысис, синмӧс
				кор куни,
Витнан баракнас коркӧся Лая посёлок,
Коді збыльысьсӧ абу нин, коді
Перспективатӧм лоис — и бырис.
Кӧр дор войтыр сэн — быдӧн мен тӧдса — 
Оліс-выліс эз во и эз дасӧс.
Шойна яг, вошӧм ді кодь, сэн колис,
Нитшӧн-турунӧн дорвыв мед туны,
Аснас тӧрытсӧ казьтывны мед.
Меддор баракас, кытӧн сэк олім,
Веськыд пельӧсас школаным вӧлі,
Миян Лайскӧй начальнӧй школа,
Кӧть и юргижӧд сэтшӧм эз вӧв.
Вӧлі «микро» жӧ школаын сэтӧн — 
Ӧти вежӧсын нач нёльнан класс.
Дӧска, карта, указка, шкап, пызан — 
Ӧтка лыдаӧсь быдӧн. И сӧмын
Парта радъясыс — быдса нёль визь...
Ӧшинь-синъяслы тыдаліс бура,
Кыдзи валъявліс ойдӧм Печора,
Кыдзи турӧбыс войлывліс сэт.
Классыс — нёль, а вот велӧдысь ӧти.
Ӧтнас мамӧ сэк велӧдіс сэн
Быд лун — сменаӧн-джынйӧн. И ме тай
Вӧлі сылӧн жӧ велӧдчысь сэк.
Тайӧн дзик ме ог ышнясь, ог ошйысь:
Сэтшӧм нырвизь мен усьліс — и пом...
Гурйыв ӧдзӧссӧ павкнитліс паметь.
Кытӧн тӧрытыс? Талуныс кытӧн?
Куньса синнад тай дзугсьывлӧ, зон.
Мӧдӧд во вылӧ войнаыс вуджис.
Тылным восьтӧ выль велӧдчан во.
Сэкся мамӧӧс аддза! Со, петӧ!
Комын арӧса мамӧӧй, энлы,
Энлы мун тэ, эн син водзсьым вош.
Лэпты вылӧджык звӧнока китӧ,
Чуктӧд колана шыяссӧ сэсь:
Мен тшӧтш, школаӧ пырысьлы, талун
Пансьӧ сымдакӧд ӧтласа нырччӧм — 
Тшӧтшъя войтырлӧн пансьӧ Урок.
Нимсӧ шулісны йӧз — 
Александра дай Фёдоровна...
Кылі мамӧӧс тешкодя выльӧн.
Быттьӧ шондіыс инас эз ӧшйы,
Быттьӧ Лаяным вӧрзьыліс сэк...
Со кор медводдза звӧнокӧс кылі — 
Кылі Тӧдӧмӧ чукӧстысь гор!
Сійӧ ышӧдіс, бур туйӧ тойліс,
Сытӧг унатор эськӧ эн вен.
Муыс ӧти, и Шондіыс ӧти,
А вот олан визь быдӧнлӧн ас.
Бӧръя звӧнокысь некод ог мынӧй...
Сыӧдз, бӧръяӧдз, ылын ли матын,
Ӧтнас тӧдӧ пӧ, шулӧны, Ен...
...Восьті син — быттьӧ ру пытшкӧ вӧйи:
Стен и йирк — ставыс еджыд. И аслам
Еджыд стихӧн жӧ, рифматӧг, дырӧн
Артмис лӧньтаса висьтасьӧм. Но
Ме ог баййӧдлы лыддьысьысь ёртӧс,
Ог и ачымӧс баййӧдлы, ог.
«Вай тэ, — помланьыс горӧкта, — вай тэ
Триньгы. Олӧмӧ кыпӧдысь звӧнок,
Школьнӧй, медводдза звӧнок, эн ланьт!»