И ЛУН. И ВОЙ...

И лун. И вой. И бара лун
Со кольӧ бӧрӧ, бӧрӧ.
А кывбур век на, быттьӧ тун,
Эз воськовт олӧм шӧрӧ.

Эз чуж на медбур сьыланкыв —
Ог мыжав йӧзсӧ сыысь,
Эз сюр кӧ медся колан кыв,
Эз сюр кӧ медшӧр шыыс.

Кӧть асьтӧ такӧдӧмыд збыль
Оз нимкодьмӧд, а парскӧ, — 
Век эскӧдан, мый сюрас быть,
Оз талун кӧ, то аски.

И ог жӧ эськӧ сӧмын дур
Да, пырӧдча жӧ ӧдас, — 
А вермас лоны: оз и сюр,
Нэм помӧдз коля сьӧдас.