БЫД ТУЙ ВОЖӦД...

Быд туй вожӧд
Локтӧ гожӧм,
Аслас тӧждӧн бара тыр.
Сиктса йӧзлы
Сійӧ вӧзйӧ
Аснас вежӧмторсӧ пыр:

Кытчӧ кежис,
Сэні-й вежыс
Петӧ-туӧ, быттьӧ ва.
Видзьяс вылын
Матын, ылын
Сынӧд — ӧтырышъя ма.

Быттьӧ кодзув
Ӧзйӧ водзын —
Бипур асылӧдз оз кус.
Грузовикным
Мудзис дзик нин —
Но ас бӧрсьыс кыскӧ бус.

Татшӧм кадӧ
Колан страда
Сиктысь бокиті оз мун.
Он ӧд дзеб тэ —
Лолӧс лэптӧ
Йӧзсӧ водзмӧстчӧдысь лун.

Визув гыӧн,
Видз выв шыӧн
Тырӧ лун — мед оз ло руд.
Муса войтыр,
Мед нӧ ойдӧ
Гожӧм, сьыланкыв и шуд!