КЫК МОРТ

«Видза олан, Климӧ!»
— Томман-быдман, Тима! —
«Кыдз нин овсьӧ?» — Эн
Зэв и юась, мыждіс ен! —
«Мый сідз?» — Соті керка-карта,
Ачым корны, куньмысьт син... —
«Кыдз нӧ сідзи кужӧдчин?»
— Сідз со! Рӧштво лунӧ парта,
Гашкӧ-й, унджык юыштсьӧм.
Юрӧй лёка сьӧкыд вӧліс!
Петі сёӧдны ме вӧлӧс,
Сиськӧс, вокӧ, уськӧдсьӧм
Ме ог тӧд нин кыдзья киысь.
Ачым этша мыні биысь,
Эг нин петкӧд рос ни ёг —
Быдсӧ сотчис! Ӧти шог
Колис, муса вокӧ, кылан.
Тэсӧ кыдз нин олан-вылан?
«Омӧль миян оласног!
Енмӧс лӧгӧдсьӧм и миян!
Рӧштво дырйи жӧ, кыдз ті,
Этша вывті юышті,
Да м’ог ӧзты мыйкӧ биӧн
Кодъюрнам, сись кусӧді.
Бинад пыр ме видзчысь, полысь.
Да со пос вывсянь тай олысь
Сідзи менӧ тойыштӧм,
Мый ме гури-люки уси
Да сэк вӧлись, зон, и шуси!
Ачыд аддзан — ки-коктӧм!»
«Норасьӧ ті ас выланыд! —
Шуас Степан налы паныд:
— Кодъюралы, миян ног,
Биӧн лёк да битӧг шог!»

1859