ВЕЖА ПЕТЫР ОСЁЛӦС ВУЗАЛӦ


Кыдзи быд мортлы, сідзи ӧтчыд и Иисуслы ковмис неуна сьӧм. Мый нӧ вӧчны? Вузавны сылы нинӧм, осёлысь кындзи, код вылын му пасьталаыс ветлӧдліс. Но нинӧм он вӧч: ыстіс сійӧ вежа Петырӧс ярманга вылӧ, медым сійӧ вузаліс Иисуслысь осёлсӧ. Воис Петырыд вузасянінӧ. Регыд мысти матыстчис сы дорӧ и медводдза ньӧбасысь:

— Мыйӧн вузалан? — юалӧ ньӧбасьысь, кодлы осёлыс кажитчӧма. Петырыд вочавидзис, сымында пӧ да сымында.

— Абу эськӧ дона, да осёлыд ичӧт.

— Ичӧт да и пӧрысь, — шуӧ Петыр.

— Дай кутшӧм омӧль!

— Омӧль, висьӧ да, — шуӧ Петыр.

Повзис ньӧбасьысьыд осёлтӧ тадзикӧн «ошкӧмсьыд» дай ӧдйӧджык муніс.

А ме вунӧді висьтавны, мый тайӧ став сёрнисӧ Иисусыд пель пӧвнас кывзіс. Матыстчис сійӧ Петыр дінӧ:

— Ок, Петыр, тадзи тэ некор он вузав тайӧ осёлсӧ! Тэ ошкы сійӧс, ӧд сідзи и коляс сійӧ сьылі выланым. Мый сэсся кутам вӧчнысӧ?

— Да ӧд ошкыны кӧ понда, сідзкӧ, тайӧ пӧръясьӧм лоӧ! — вочавидзӧ Петыр.

— Но ладнӧ, ладнӧ: вузасьӧм, сійӧ и эм вузасьӧм, — шуӧ Иисус Петырлы.

Та бӧрын Иисус колис Петырӧс ӧтнасӧн, но стрӧга тшӧктіс осёлсӧ вузавны. Быть вузавны!

Но эз артмы. Регыд Петыр осёлыскӧд тшӧтш бӧр воис гортас, сідз эз и вермы вузавныс. А кыдзи сэсся Иисус мездысис сьӧкыдлунсьыс, висьтавны ог вермы, сы вӧсна мый эз тӧд тайӧс и сійӧ, кодсянь тайӧ вӧвлӧмторсӧ ме кывлі.


Вуджӧдысь: 
Гижӧд
Вежа Петыр осёлӧс вузалӧ
Жанр: 

lkejrlkelkrgner klrjnelknfrkl ekjnrjkenfrej

1