ВӦЛӦ ПӦРТЧӦМ ПОП


Ӧтчыд мӧдӧдчис поп сьӧд няньла — еджыд няньсьыс умӧма да. Мунігас паныдасисны сылы кык ветлысь-мунысь. Найӧ юалӧны сылысь:

— Кытчӧ мунан, батюшко?

— Корся аслым сьӧд нянь. Уми нин ме еджыд няньсьыс. Ветлысь-мунысьыд ӧта-мӧд вылас видзӧдлісны дай ӧтиыс мӧдыслы шӧпнитіс:

— Кыскы нопсьыд сермӧд да кучкы сійӧн батюшколы юрас. Кучкис поптӧ сермӧднад юрас, да батюшкоыд вӧлӧ пӧртчис.

Паныдасис ветлысь-мунысьыдлы гӧль морт. Юасьӧны сылысь, кытчӧ мунӧ.

— Ярманга вылӧ муна вӧв ньӧбны. Менам челядьӧй уна, ог вермы найӧс вердны.

— Босьт инӧ тайӧ вӧвсӧ, во чӧж верман уджавны сійӧн. Пу пилипызь кындзи, сійӧс нинӧмӧн оз позь вердны. Стӧч во мысти татчӧ локтам, да тэ миянлы бӧр сійӧс сетан.

Во мысти гӧль мортыд вайӧдіс вӧвтӧ, кытысь босьтіс. А тӧдса ветлысь-мунысьыд сэні нин. Юалісны найӧ гӧль мортыдлысь:

— Мый тэ нажӧвитін тайӧ вӧвнас, гӧль морт?

Сійӧ вочавидзӧ:

— Ӧти вӧлӧс нажӧвиті.

— Сідзкӧ, босьтлы нӧшта на ӧти во кежлӧ, нажӧвитчы.

Кор коли и тайӧ воыс, ветлысь-мунысьыд бара юалӧны:

— А ӧні мый тэ нажӧвитін?

— А нажӧвиті ме нӧшта ӧти вӧлӧс. Тайӧн кӧ тшӧтш, менам куим нин.

— Ладнӧ, босьтлы нӧшта ӧти во кежлӧ, нажӧвитчы.

Нажӧвитіс сійӧ нӧшта вонад телега. Ӧти ветлысь-мунысьыд и шуӧ:

— А ӧні нуӧд тайӧ вӧвсӧ со эсійӧ сиктас. Домав сійӧс батюшколӧн гидняас.

Вайӧдіс мортыд вӧвтӧ батюшко гидняӧ. А попаддяыд тайӧ каднад ёна гӧльмӧма. Лёкиник мӧс кындзи, нинӧм сылӧн абу нин кольӧма. Петіс попаддяыд ӧти водз асылӧ мӧссӧ лысьтыны, а сэні вӧв ветлӧдлӧ да урӧдитӧ. Кватитіс попаддяыд куйӧд лэбын да кыдз тай косьыштас йӧй вӧвтӧ. Видзӧдӧ да, вӧв юрсьыс сермӧд тыдалӧ. Кутчысис сермӧдас да кутіс кыскыны. Кыскис да кыскис, кытчӧдз дзоньнас эз кыскыссьы. Сідзи сёрмӧдтӧ кыскигад и гортӧдзыс воис. Вӧлыд бӧр попӧ пӧртчис. Пырӧ керкаас, а гӧтырыс и юалӧ:

— Кӧн нӧ ӧнӧдз вӧлін?

— Кӧні вӧлі?.. Вӧлӧн ме куим во чӧж вӧлі. Пу пилипызь кындзи, нинӧм эг сёйлы. А тэ менӧ нӧшта на и лэбынӧн гӧститӧдін.

Ёна и омӧльтчӧма вӧлӧм кыз попыд.


Вуджӧдысь: 
Гижӧд
Вӧлӧ пӧртчӧм поп
Жанр: 

lkejrlkelkrgner klrjnelknfrkl ekjnrjkenfrej

1