СЮСЬ КАТИЦА


И Матяш король дырйи Венгрияын вӧлі уна мича ныв. На пӧвстын медся мичаыс — Катица нима ныв. Мичлуныс сылӧн вӧлі сы мында, мыйта ӧтвылысь Маришкалӧн, Эржикелӧн да нӧшта на Кристиналӧн.

Но Катица эз сӧмын мичлунӧн нимав. Вӧлі сійӧ нӧшта зэв сюсь да вежӧра. Кӧть став государствосӧ кытшовт, а сюсьджык да вежӧраджык нылӧс он аддзы.

Коркӧ и Матяш пельӧдз кывсис сюсь Катица йылысь. Король шуӧ аслас кесйылӧсъясыслы:

— Кӧсъя и ме тшӧтш сёрнитыштны тайӧ нималана Катицаыскӧд. Вайӧдӧй сійӧс ме дінӧ Будаӧ.

Гортас Катицаӧс вӧччӧдісны, сетісны сьӧрсьыс ноп да мӧдӧдісны Будаӧ король дорӧ.

А сэк кості Матяш король юрсӧ жуглӧ-мӧвпалӧ, кутшӧм эськӧ мудерджык юалӧмъяс дасьтыны нывлы.

Регыдӧн Катицаыд и воис Будаӧ. Вайӧдісны сійӧс король водзӧ. Король и шуӧ:

— Но, Катя-Катица, кывзы менӧ сюся. Юала тэнсьыд куимтор. Кужан кӧ на вылӧ сюся да мудера вочавидзны, сэки и корольыд тэнад шуас, мый тэ медся сюсь ныв государствоаным. Со медводдза юалӧм. Менам чардакын эм сё вося торк^Торк — пакля./^. Висьтав, кужан-ӧ тэ меным сыысь зарни шӧрт печкыны?

— Дерт, кужа, менам корольӧй, — пыр и вочавидзис Катица, — сӧмын медым печкыны зарни шӧрт сё вося торкысь, тшӧкты вӧчны айӧлӧн сё вося потшӧсысь зарни чӧрс.

Король дӧвӧля довкнитіс юрнас, бур пӧ.

— Но, сідзкӧ, мӧд юалӧм, нылӧй! Эм менам чардакын сё розя кувшин. Верман-ӧ тэ найӧс дзоньтавны?

— Дерт, верма, менам корольӧй! — зэв окотапырысь, нюмъялігтырйи вочавидзис ныв, быттьӧ сӧмын и виччысис, кор сійӧс корасны кувшинъяс дзоньтавны. — Ӧдйӧ и дзоньтала, сӧмын гугӧдӧй сёнан кувшинсӧ. Ӧд весиг йӧй и сійӧ тӧдӧ, мый дӧмастӧ бан вылӧ оз вурлыны.

Матяш король нимкодьпырысь бара довкнитіс юрнас:

— Аддза, аддза, дона ныв, мый тэ зэв сюсь, сӧмын кӧсъя тэнӧ корны, медым тэ вайин меным и эн вай сійӧс, мый эськӧ вӧлі и эз вӧв.

— Виччысьлы, менам корольӧй, ӧти здук, пырысь-пыр вая! — тайӧс шуӧм бӧрын нылыд уйкнитіс залысь. Видзӧдӧны, а сійӧ бӧр нин локтӧ. Киас кутӧ кык пож, ӧтисӧ мӧднас тупкӧмӧн. Сувтіс король водзӧ, пуктіс пожъяссӧ джоджас корольлы кок улас и шуӧ:

— Менам корольӧй, кыдзи тэ тшӧктін, сідзи ме и вӧчи.

Сӧмын Матяш кӧсйис видзӧдлыны, мый Катицаыд сылы вайис, сӧмын лэптыштіс вылыс пожсӧ и — порх! — лэбзис сэтысь еджыд гулю. Вӧлі — и абу!

— Муса нылӧй, — шуис король, — ӧні нин и ме аддза, мый оз весьшӧрӧ шуны: тэысь сюсьджыкыс да вежӧраджыкыс збыль некӧн, тыдалӧ, абу, — и тшӧктіс казначейлы сетны Катицалы козин, 100 зарни деньга верӧс сайӧ петігкежлас, да сиис сылы уна шуд.


Вуджӧдысь: 
Гижӧд
Сюсь Катица
Жанр: 

lkejrlkelkrgner klrjnelknfrkl ekjnrjkenfrej

1