МЫЙ МӦВПАЛӦ ПААЛ КИНИЖИ АСЛАС ЮР ЙЫВСЬЫС


Венгрияын ставыс тӧдӧны, кыдзи ӧти зэв ён зон, мельниклӧн пи, веськаліс салдатӧн Матяш король войскаӧ. И шуӧны вӧлі зонсӧ Кинижи Паалӧн. Недыр мысти аслас сям да сюсьлун отсӧгӧн Кинижи Паалыд быдмис войскаӧн юралысьӧдз. Матяш корольыд ӧд оз вӧлі видзӧд мортлӧн рӧд вылӧ, а донъялӧ вӧлі быдӧнӧс морттуй сертиыс. А Кинижи зонмыд эз сӧмын ён вӧв, но и нималіс вежӧра мортӧн. Вӧрӧгъяскӧд косьын эз сӧмын кужӧмӧн ӧвтчы саблянас, но и унаысь петкӧдліс ассьыс мывкыдлунсӧ, мудерлунсӧ, корольлы вернӧйлунсӧ — сы понда и лоис Кинижи Паалыд ыджыд чина мортӧн, кыдзи мадьяръяс шуасны — визирӧн.

Ӧтчыд Матяш король и шуӧ Кинижи Паалыдлы, ыста пӧ ме тэнӧ турокъяслӧн султан дорӧ посолӧн.

А тані колӧ гарыштны, мый султаныслӧн вӧлі сэтшӧм мода: кодкӧ кӧ сылы мыйӧнкӧ оз глянитчы, сійӧс дженьдӧдӧ ӧти юр сода. А сэки султаныс вӧлі буретш лёк руа, Матяшлӧн визиръясыс вӧлі венӧны турокъяслысь медся бур войскасӧ да.

Кинижи Паал гыжйыштіс пель сайсӧ да и шуӧ:

— Муна, дерт, менам корольӧй, ыстан кӧ. Но мый лоас, менсьым юрӧс кӧ керыштас скӧр султаныд?

— А керыштас кӧ, тэнад ӧти юр пыдди ме керышта юрнысӧ 30 сюрс туроклысь!

— 30 сюрс юр! Да, тайӧ зэв мича лыдпас, — вочавидзис та вылӧ Кинижиыд, — сӧмын пола, мый 30 сюрс юрысь ни ӧти юр оз кут пукавны сэтшӧм лӧсьыда Палко сьылі вылын, кыдзи ӧніяыс.

Матяш король та вылӧ нюммуніс да меліа малыштіс том мортӧс бан бокӧдыс:

— А ӧд збыльтор висьталан, зонмӧй, и меным ёнджыка кажитчӧ Палко сьылі вылын тайӧ юрыс.


Вуджӧдысь: 
Гижӧд
Мый мӧвпалӧ Паал Кинижи аслас юр йывсьыс
Жанр: 

lkejrlkelkrgner klrjnelknfrkl ekjnrjkenfrej

1