ФРАНЦИЯСА КНЯЗЬ ДА МАТЯШЛӦН ВОЕВОДА


Кор Матяш король ордӧ чукӧртчывлісны мукӧд муясысь, саридз сайясысь воӧм ыджыд чина гӧстьяс асланыс государственнӧй могъясӧн, Матяш король пыр вӧлі ошкӧ ассьыс мадьяръяссӧ. Францияысь ӧти князь и шуӧ: зэв пӧ меным окота лои видзӧдлыны, кутшӧмӧсь найӧ — мадьяръясыс.

Матяшыд сэк жӧ и гижис ӧти воеводалы, медым сійӧ пырысь-пыр локтіс Будаӧ аслас быд лунъя паськӧмӧн.

Воеводаыд гижӧмтортӧ лыддис дай пасьтасис: паськыд гач, кукань кучикысь дӧрӧм, тасма вылас табак кӧшель, гӧгрӧс шляпа, шляпаас сюйыштӧма мич вылӧ паськыд сорса турун сі. Татшӧм паськӧмӧн и локтіс Матяшлӧн крепостьӧ, кӧні сійӧс виччысисны ылыс муясысь гӧстьяс. Матяшыд кинас петкӧдлӧ: со пӧ и мадьяр.

Францияса князьыд чуймӧмӧн гӧгӧрбок видзӧдӧ воевода вылӧ. А воеводаыдлы быттьӧ и абу ёна лӧсьыд, неуна шӧйӧвошыштіс: вывті нин сы вылӧ видзӧдӧны да. Медым кыдзкӧ дзебны шӧйӧвошӧмсӧ, сійӧ кыскис каллянсӧ да кутіс весавны сэтысь табаксӧ, сэсся тай кыдз сьӧлыштас югъялысь джоджас.

Францияса князьыдлы тайӧ зэв ёна эз кажитчы, сійӧ зывӧкпырысь видзӧдліс сы вылӧ да шуис аслас кыв вылас:

— Тайӧ порсь, а абу морт!

Та вылӧ воеводаыд веськыда жӧ и крапкис:

— Батьыд тэнад порсь!

Кыкнанныс ӧта-мӧд выланыс зэв ёна скӧрмисны. Кыкнанныс пӧсь вираӧсь да, муртса ӧта-мӧд выланыс оз шыбитчыны. Но ыджыд чина йӧз, да петукъяс мозыд оз жӧ позь. И сёрнитчисны найӧ тышкасьны вӧвъяс вылын сабляясӧн.

Воеводаыд тшӧктіс кесйылӧсыслы^Кесйылӧс — слуга./^ саблясӧ вайны. Кесйылӧсыс ӧдва и вайис — сэтшӧм сьӧкыд вӧлӧма сабляыс. А воеводаыд ворсігмозыс кокньыдика босьтіс саблясӧ да пондіс юр весьтас бергӧдлыны сійӧн.

Францияса князьыд татшӧмтортӧ аддзис да кӧсйис пыр жӧ прӧща корны, но эз удит, коньӧрыд. Воеводаыд ӧвтыштіс саблянас да французыдлысь пельпомсӧ кык пельӧ и поткӧдіс, дай вӧлыслысь юрсӧ на керыштіс.

Кор Францияын тӧдмалісны тайӧ вӧвлӧмтор йывсьыс, гижисны Матяш корольлы, медым эськӧ ыстіс Францияӧ сійӧ мадьярсӧ саблянас: видзӧдлыны пӧ окота сэтшӧм ён морт вылас.

— Саблясӧ верма ыстыны, — вочавидзис письмӧӧн жӧ Матяшыд, — но мортыслы некор шӧйтны, сылӧн уджыс уна.

— Но, сідзкӧ ыстӧй кӧть нин саблясӧ видзӧдлыны! — бара воис Францияысь корӧм. Матяшыд саблятӧ ыстіс. Французъясыд саблятӧ гӧгӧрбок видлалісны, кианыс бергӧдлісны дай гижисны Матяшыдлы:

— Но тайӧ абу сійӧ сабляыс!

— Сабляыс эськӧ сійӧ, — вочавидзис та вылӧ Матяш король, — да киыс абу сійӧ.


Вуджӧдысь: 
Гижӧд
Францияса князь да Матяшлӧн воевода
Жанр: 

lkejrlkelkrgner klrjnelknfrkl ekjnrjkenfrej

1