МАТЯШӦС КОРОЛЬӦ БӦРЙӦМ


Матяш король войдӧр вӧлӧма казакӧн. Ӧтчыд вӧтнас волас сылы андел да висьталас: корольӧн пӧ лоан.

А казакаліс Матяшыд ӧти озыр кӧзяинлы, кодлӧн вӧлі квайт ӧш. Кӧть и озыр вӧлі кӧзяиныс, а ачыс уджаліс жӧ Матяшкӧд. Коркӧ ӧтчыд уджаласны-гӧрасны да и пуксясны пажнайтны. Пажнайтіганыс Матяшыдлӧн кӧзяиныс шмонитігмоз и шуас:

— Талун кутасны корольӧс бӧрйыны. Тӧдан-ӧ тэ, Матяш, та йылысь? Гашкӧ, тэнӧ бӧръясны да!

— Збыль, ме лоа корольӧн, — шуыштіс Матяшыд.

— И кор нӧ тайӧ лоас? — тешитчӧм могысь юаліс кӧзяиныс.

— А сэки, кор менам плеть вороп вылын веж коръяс мыччысясны, — лабутнӧя, асьсӧ пыдди пуктӧмӧн вочавидзис казакыд.

Кӧзяиныс та вылӧ сӧмын вомсӧ пӧлыньтӧмӧн нюммуніс.

Пажын бӧраныс найӧ водзӧ пондісны гӧрны. Матяшыд сӧмын му помӧдзыс и воис, видзӧдӧ, а плетьыслӧн вороп вылас мичаник ичӧтик коръяс вежӧдӧны. Му помас Матяшыд бергӧдчис да бӧр ӧшъяс бӧрсяыс мунӧ. Воис му шӧрӧдзыс, да юр вылас сылы шняпкысис вывсянь корона. А ӧшъясыд дышмыштӧмаӧсь. Матяш сійӧ здукас ӧвтыштіс плетьнас да гез помыс буретш крукасис коронавывса крестас. Крестыс и нюкыльтчис неуна. Сійӧ кадсяньыс мадьяръяслӧн корона выланыс крестыс пыр пӧлӧс.

А рытнас тӧкӧтьӧ Матяш казакыд удитіс гортас локны, кыдзи воисны нин сыла, медым парламентӧ нуӧдны. Вайӧдісны парламентаныс. Ӧдйӧ и велӧдчис Матяшыд лыддьысьны да гижны — ёна сюсь зонмыд вӧлӧма да. И лоис сійӧ корольӧн. И доза бура да кужӧмӧн юраліс государствонас. А кор Матяшыд куліс, лоис сійӧ вежаӧн. Енмыс сетіс сылы бордъяс: ӧд эз вӧв сыӧдз сэтшӧм веськыд оласнога, ыджыд сьӧлӧма да йӧзӧс пыдди пуктысь корольыс, и сы бӧрын эз вӧв сэтшӧмыс, и некор оз ло!


Вуджӧдысь: 
Гижӧд
Матяшӧс корольӧ бӧрйӧм
Жанр: 

lkejrlkelkrgner klrjnelknfrkl ekjnrjkenfrej

1