ВАЛА ТУЙӦД

Вала туйӧд гудӧкаяс лэччисны,
Кильчӧ вылын томлуныд оз ов.
Ӧшинь дорысь мича нывъяс чеччисны,
Налы дасысь корӧмыд оз ков.

Вомын юрын гудӧкаяс кылӧны
Да оз ланьтны, кӧть и лоӧ сёр.
Вомын юрын мича нывъяс сьылӧны
Да оз тӧдны, помыс воас кор.

Сьӧлӧм дорын бара сьӧлӧм шоналӧ,
Бара сывйӧн шебрасьӧма сыв.
Бара медся мичалы да доналы
Кодкӧ шӧпкӧ медся муса кыв.

Вала туйӧд ныла-зонма кайӧны,
Да оз тыдав, коді кодкӧд сэн.
Вала туйысь найӧ муслун вайӧны,
Коді сюрис коркӧ тэд да мен.