ЗЭВ ТАЙ ЛӦСЯЛІМ

Кывнас мавтіс да, сідзи-й ылӧдіс,
Эз тай кампет ли мый ли ков.
Дыр нин ветлӧдлам керӧс йылӧдыс,
Ог тай батьысь ни мамысь пов.

Кынма вӧлі да, дзикӧдз пӧсялі,
Эз тай пестыны ковмы би.
Зэв тай радейтчим, зэв тай лӧсялім,
Зэв тай шудаӧсь лоим ми.

Гашкӧ, вывтіджык сыкӧд горшасям,
Да ӧд кильмӧдӧ тувсов вой.
Веськодь, коркӧ мый синва доршасяс,
Веськодь, коркӧ мый пӧжа дой.

Зэрыс кӧтӧдас, тӧлыс тӧлӧдас,
Унмӧс пальӧдас варов ёль.
Эськӧ ӧти жӧ мамлӧн вӧлі да,
Эськӧ эг жӧ на ӧткӧн коль...