ШӦЙӦВОШӦМ

Кыдз быттьӧ сылӧм госысь колис дзиж,
Ог кыпав ловнам, нинӧм ме ог гиж.
Нянь кудйӧ увтысь пон моз вошті нырис,
Кӧть парма йирын зверь да пӧтка тырыс.
Мый колӧ меным, кыптіс медым лов?
Ог ачым тӧд — оз нянь да, кӧнкӧ, сов?
Ог вись, и гортын ставыс быттьӧ лада,
А гашкӧ, мыжа весьӧпӧрӧм кадыс?
А гашкӧ, ӧткӧн колис менӧ Ен
И некор ангел оз нин мыччысь мен?
Ог тӧд, ог тӧд. Дзик быттьӧ лои выжыв
Да Эжва горув лэдзи пипу пыжӧс.