ИЧИНЬ

...Сергей! Мыйла нӧ он шыась? Мыйла он пальӧд курыд шогсӧ муса Машукыдлысь? Шыасьлы, Сергей. Сійӧ пыр на радейтӧ тэнӧ. Со тіян местаын сулалӧ — Эжва кыр йылӧ чепӧсйӧм пожӧм дінын. Бӧрдӧ Машаыд, бурӧдны колӧ.

Но оз кыв Сергей. Шувгӧ пожӧм. Тӧлыс лёка усьласьӧ сы вылӧ, чашйӧ и Мария Васильевна вылысь платтьӧсӧ. Шондіыс важӧн нин пуксис: арыд ар и эм. Мыш кузяыс йирмӧг ветлӧ, а гортас кайны абу окота. Сы бӧрын, мый лои талун, кытчӧкӧ эськӧ воштысьны.

Мария Васильевна косӧдіс синъяссӧ чышъян помнас. Юрас жувгис бӧрдӧмысла, но лоӧмторйыс бара сувтіс синъяс водзас.

Фермаысь локтіс сёрӧн, турун ёна ковмис пыртлыны. Выль верӧсыс эз на жӧ вӧв. Тыдалӧ, карӧ комбикормла лэччылісны да, абу на воӧма. А колӧкӧ, и ылаліс кытчӧкӧ.

Куим арӧса Толя бӧрдіс, корис сёйны. Зина вайӧма сійӧс детсадйысь да абу и видзӧдлӧма, котӧртӧма кытчӧкӧ ворсны. Ӧндрей мӧд вежӧсын баянӧн дзазӧдчис. Дышӧдіс, тыдалӧ, да клубӧ мунны кутіс лӧсьӧдчыны.

— Лыддьысьыштін эськӧ, Ӧндрей, омӧля, буракӧ, велалан да. Бурджыка гортса уджтӧ вӧч, — босьтчыліс паныдавны сійӧс Мария Васильевна.

— Ассьыд питӧ велӧд, — пинь пырыс сӧдзӧдіс мӧдыс да крапкис ӧдзӧсӧн. Посводзын, кылӧ, ещӧ сьӧлыштіс.

Татшӧмыд кыдзи и школасӧ помалас? Оз и книгаяс саяд пуксьывлы. А шыӧдчас кӧ верӧс дорас, мӧдыслӧн юрыс оз вись:

— Менлы моз машина рульыд век нин сюрӧ.

Кыськӧ локтіс Зина. Мария Васильевна тшӧктіс отсыштны горт гӧгӧр, но дас нёль арӧса ныв эз и думыштлы кывзысьны: аслам пӧ уджыс тырыс. Пырис аслас жырйӧ, и став сёрниыс.

Здук мысти бӧр петіс ыджыд комнатаӧ да веськӧдчис ӧдзӧслань.

— Кытчӧ нӧ? — юаліс Мария Васильевна.

— Кӧть кытчӧ, — ярскӧб вӧлі нывкаыс.

— Некытчӧ он мун. Толякӧд олышт, — кӧсйис сувтӧдны Зинаӧс пышйӧмсьыс.

— Лэдз, а то мыйӧнкӧ шусян! — тракнитчис лёкысь Зина да ичиньыслӧн киысь друг мынӧмысь гатш уси джоджӧ. Звирк чеччис да нӧшта ӧддзис: — Убирайтчы! Мед дукыд эз вӧв. Некод тэнӧ татчӧ эз кор.

И том нывбаба котӧртіс ю дорӧ.

Шувгӧ пожӧм. Эжва катласьӧ сьӧд гыясӧн. Тӧлыс крепаммӧ, быттьӧ Мария Васильевнаӧс вӧтлыны кӧсйӧ. Но нывбаба оз мун, кӧть кӧдзыдысла сырмӧ-тіралӧ.

— Сергей, мусаӧй менам. Мыйла нӧ менӧ да Толюктӧ колин? — бӧрдіс Мария Васильевна. — Шогмытӧм ӧд дзик олӧмыс лоис. Мый нӧ меным вӧчны? Юас пырны?

«Рядӧвӧй Лобанов Сергей Михайлович герой моз пӧгибнитіс служебнӧй могъяс олӧмӧ пӧртігӧн», — татшӧм кывъяса бумага воліс частьса командованиесянь, кӧні служитіс верӧсыс. Нӧшта вӧлі содтӧма, мый Сергейӧс дзебасны места вылас, и Мария Васильевналы локны оз ков. Буракӧ, Чечняад згинитіс. Детдомса Сергейыс вӧлі да, некодлы сэсся вӧлі тӧждысьнысӧ. Сідзи некытчӧ ветлытӧм и лои. Дзебанінсӧ быттьӧ тӧдӧ жӧ-а. Гашкӧ, коркӧ и удайтчылас на ветлыны, пиыс быдмас да.

Унаӧн эськӧ верӧс пӧгибнитӧм бӧрас корасьны первой воас жӧ волісны, но некод сайӧ эз пет. А таво со ӧтувтчис дӧвеч Ӧнтон Педӧркӧд. Юышталӧ эськӧ мортыс, да челядьыс жальӧсь лоисны. Сэсся и аслас Толюкыс на Сергейсяньыс колис, бать борд улын жӧ окота лоис быдтыны. Сӧмын тай нинӧм оз ладмы, оз кывзысьны Педӧрлӧн челядьыс, мам туйӧ оз пуктыны.

Мария Васильевна дыр на ышлолаліс да вӧлисти кайис, ю дорӧ мыссьыны лэччылӧм бӧрын, кыр йылӧ. Сикт вӧйӧма нин пемыдас.

— Кайны лоӧ, — ас кежын сёрнитіс нывбаба. — Быть ӧд. Ладмам, гашкӧ, коркӧ. Гӧгӧрвоасны жӧ...

Нӧшта видзӧдліс ю вылӧ. Топӧдліс пожӧмӧс. Бергӧдчис сиктлань банӧн, и сьӧлӧмыс ёкнитіс повзьӧмысла. Катыдладорын, кӧні вӧлі и налӧн керкаыс, мыйкӧ сотчис. Мария Васильевна шыбитіс важиник пальтосӧ, нетшыштчис места вывсьыс.

Сотчис налӧн керканыс. Котралісны багыръяса да ведраяса йӧз.

— Кӧнӧсь челядь? — мый вынсьыс горӧдіс нывбаба.

— Абуӧсь керкаас. Сиктысь корсьӧны!

«Сиктынӧсь кӧ Ӧндрей да Зина, Толюкӧс эз босьтны», — вирдыштіс нывбабалӧн юрас, и сійӧ чепӧсйис ыпъялан кильчӧлань.

— Кутӧй! Сотчас! — горӧдісны ӧтпырйӧ унаӧн, но вӧлі сёр нин.

Бура дыр мысти кильчӧ вылӧ петіс ставнас нин ыпъялысь Мария Васильевна. Сійӧ надзӧникӧн лэдзис мыйкӧ джодждӧра пиӧ гартыштӧмаӧс да усис ачыс.

Сӧмын вит лун мысти восьтіс синъяссӧ нывбаба районнӧй больничалӧн палатаын. Лэдзисны сы дорӧ верӧссӧ да челядьсӧ.

— Мамӧ, мамӧ! — горӧдіс ичӧтик Толя да уськӧдчис крӧватьлань, но кутіс Зина.

Матыстчис крӧвать дорӧ Педӧр, шӧпнитігмоз шуис:

— Прӧстит менӧ, Маша.

А бан бокъясӧдыс тюрисны ыджыд синва мольяс.

— Педӧр, челядьтӧ видз. Ме дыр на ог бурд: ёна сотчавсьӧма. Юӧмсьыд шыбит...

— Мамӧ, эн бӧрд, — первойысь мамӧн шуис ичиньсӧ Зина. Сыкӧд орччӧн синсӧ тілис Ӧндрей.