ПАРМА ШӦРЫН ИЧМОНЬ СЬЫЛӦ

Парма шӧрын ичмонь сьылӧ,
Сьӧлӧм вылас ёна бур.
Ок и лӧсьыд гӧлӧс сылӧн,
Сыысь лӧсьыдыс оз сюр.

Тёльгӧ, быттьӧ визув ёльыс,
Дзользьӧ, быттьӧ колипкай.
Муса томлунӧй пӧ колис,
Оз пӧ мӧдысь волы тай.

Коркӧ тайӧ вӧрас вошис
Алӧй лента да оз сюр.
Гашкӧ, гуас нуис ошкыс?
Гашкӧ, позъяс дзебис ур?

Парма шӧрын ичмонь сьылӧ,
Гортас рытӧдзыс оз лок.
Тайӧ сьылӧмсӧ кор кыла,
Босьтӧ менӧ кыпыд шог.

Ӧд и аслам томлун колис,
Ог нин майӧг йылӧ кай.
Тёльгы, тёльгы, муса ёльӧй,
Йӧзсӧ дыр на гажӧд вай.