КОМИ ГАЖ

Кокъяс улӧ зарни койӧ арыс,
Тан, Сибырас, енэж вель жӧ лӧз.
Ылі муын аддзысим ми бара
Ӧти вужйысь петӧм коми йӧз.

Тобол весьтын кылӧ
Сьылан выль и важ.
Коми мусянь ылын
Юргӧ коми гаж.

Зэв на мича лунъяс Енмыс сетіс,
Ӧзтіс пелысь туйяс пӧлӧн би.
Мыйла эськӧ синва миян петӧ?
Мыйла эськӧ торйӧн олам ми?

Мед жӧ овсяс водзӧ кыпыд лолӧн,
Мед жӧ лёкыс миянӧс оз су.
Сэсся асьныд Коми муӧ волӧй,
Сійӧ — тіян Ыджыд чужан му.