КИТШ ДА СИКӦТШ
Настя да Маша ворсісны чомйысь. Бура дыр нин. вӧчалісны сёйысь сӧчӧнъяс да пукталісны пӧв пом вылӧ шонді водзӧ, мед косьмисны. Медбӧрти дышӧдіс. Сэтчӧ жӧ горшныс косьмыны кутіс.
— Лок, йӧв юыштам, — нуӧдіс Настяӧс Маша гортас. Ворсісны ӧд сылӧн ӧшинь улын.
Холодильникса йӧлыс, кодӧс тринькнитісны кружка тырӧн, и горшнысӧ веськӧдіс, и кынӧмнысӧ пӧткӧдіс. Кӧть мӧд скон сёйсьыс вӧчась, но нывкаяс пуксисны видзӧдны телевизор. Мӧдӧд программаті буретш мультик петкӧдлісны, кӧн тай осёллы порсьпи, ошпи, кӧч да сюзь козинъяс сеталӧны.
— Менам регыд чужан лун жӧ, — мультфильмсӧ видзӧдӧм бӧрын шуис Настя. — Мамӧ кӧсйӧ часі ньӧбны.
— Менам тулыснас нин вӧлі. Мамӧ сикӧтш козьналіс. Видзӧдлам, колӧк, — Маша улӧс вывсянь судзӧдіс сервант вылысь мичаа серпасалӧм ичӧтик кӧрӧб.
— Ой, кутшӧм мича! — зарниӧн лӧсталысь сикӧтшсӧ аддзӧм бӧрын быдсӧн горӧдіс Настя. — Вай пасьтавла...
Настя вӧлі Машалӧн пӧдругаӧн, и эз вӧв жаль, мед ёртыс ӧшӧдліс сьыліас сылысь зарни сикӧтшсӧ, кодӧс кутас новлыны школаӧ пырӧм бӧрын. Мамыс тадзи шуис. Настя ӧдйӧ и пысаліс Машалысь козинсӧ да котӧртіс рӧмпӧштан дорӧ. Ёна и бергаліс сы водзын. Сэсся Маша вежнясис. Настялы лои завидь. Мамыслы тшӧктас, мед часі пыддиыс сикӧтш жӧ ньӧбас.
Рӧмпӧштан дорӧ ылавлӧм бӧрын нывкаяс лэччисны сялькӧдчыштны ю дорӧ. Маша, вунӧдіс пӧрччынысӧ да, сикӧтшнас и сорӧн. Ю дорӧ воӧм бӧрын казяліс да, мед эз вош, пӧрччис, пуктіс паськӧм вылас. Сэсся нывкаяс пырисны юбокса шоныд куръяӧ да став йывсьыс вунӧдісны.
А берег пӧлӧн ветлӧдліс мам дорсьыс уйкнитӧм катшапи, кодӧс шуисны Китшӧн, да корсис чери. Ичӧтик йӧршпиянӧс ичӧтик жӧ вуграсьысьяс тшӧкыдакодь кольлісны косьмыны лыа вылӧ. Друг мыйкӧ югнитіс синъяс водзас, кодъяс сылӧн зэв бура аддзисны. Клянича, кӧнкӧ. Но матыстчис да аддзис, мый тайӧ абу клянича. Сійӧс Китш тӧдӧ бура. Туй вылын и помӧй гуяс дорын тырыс туплясьӧ. Челядь кокнысӧ дойдалӧны да бӧрдӧны, кӧть асьныс жӧ и бутылкаяссӧ жуглӧны. «Мый нӧ эськӧ тайӧ? — мӧвпаліс Китш. Сылы зэв окота вӧлі тӧдны, мый жӧ татшӧм мичаыс. — Часлы, мамӧлы лэбӧдла». Эз кут мӧвпавны, бур тайӧ али лёк, кӧть эськӧ гусявны лӧсьӧдчис. Китш вӧлі ичӧтӧн да эз на вежӧрт, мый сэтшӧм гусясьӧмыс. Топӧдіс вомас сикӧтшсӧ и ӧвтыштіс бордъяснас.
Мамыс буретш корсис сійӧс пажнайтны да видіс код тӧдас кӧн ветлӧмысь.
— Со мый ме аддзи, — нюжӧдіс Китш мыр вылӧ вайӧм сикӧтшсӧ. — Мый нӧ тайӧ?
— Кысь нӧ, пиӧ, зарни сикӧтшсӧ вайин? Код нӧ татшӧм донаторсӧ воштӧма? Али гусялін, йӧзлысь босьтін? — юасьны кутіс мамыс.
— Ог тӧд, мый тайӧ, да тэнсьыд юавны вайи. Нывкаяс вӧлі купайтчӧны да налӧн паськӧм вылысь босьті.
— Нывкаяс, шуан? Татшӧм дона сикӧтшъяс нин кутісны налы ньӧбавны? Менам том дырйи некодлӧн сиктас эз вӧв-а... Вай жӧ, пиӧ, бӧр лэбӧд сикӧтшсӧ, пукты местаас да некор йӧзыслысь нинӧм эн босьт. Чилзӧны на кылӧ нывкаясыд, абу на юсьыс петӧмаӧсь.
И Китш бӧр тӧвзис вадорӧ.
