ГУДӦК


Витяӧс, кодӧс батьыс Виталейӧн шуӧ, магнит моз кыскис гудӧк шы. А гудӧксӧ кор аддзыліс, синъясыс ӧзйылісны. Сэтшӧма сійӧ гудӧксӧ радейтіс, сэтшӧм окота вӧлі ворсысьыс моз кизьяссӧ личкавны, пытшкӧссьыс мича шыяс петкӧдны. Мукӧд зонкаыслы гудӧкыд дзик веськодь, а сылы колӧ — и ставыс. Окота, да он тай топӧд морӧс бердад. Сетлісны эськӧ ворсыштны кодсюрӧ, кор аслыныс дышӧдліс, но сетлӧмыд — сетлӧм и эм. А бать-мамыслысь дзайгис кӧть эз, быттьӧ эз и кывлыны.

Но ӧти лунӧ шондіыс, буракӧ, сӧмын Витялы и петкӧдчис. Локтіс орчча сиктын олысь пӧчыс — и мый ті думайтанныд — вайис чужан лун кежлас буретш гудӧк. Бать-мамыс висьталӧмаӧсь ли ассьыс, Витялысь, коркӧ дзайгӧмсӧ кывлӧма. Эз гудӧк, а чача вайис. Мекъяссӧ Витя паськӧдіс да керкаын кыа ломзис, кизьясыс войся енэжын югыд кодзувъяс моз пӧртмасьны кутісны. Сэтшӧм рад Витя лоис, быдсӧн пӧчсӧ бан бокас окыштіс, кӧть лыддис, мый окасьӧмыд сӧмын нывкаяслы лӧсялӧ.

— Нолтӧ, видлы, видлы, пиӧ. Магазинсьыс Гора Ванькӧд бӧрйим. Сійӧ миян главнӧй гудӧкасьысьыс. Лӧсьыд пӧ гӧлӧсыс, шуис, — ыззьӧдіс пӧчыс. — Вай гажӧдышт пӧчсӧ. Кывлі, лӧсьыда нин пӧ ворсан.

Кытчӧ воштысян, пӧчыд кӧ корӧ? И кӧть Витя яндысьыштіс да ворсӧмыс артмис эз на бура, босьтчис корсявны «Чужи-быдми сьӧд вӧр шӧрын», кодӧс Прокӧ Митрей ӧтырышъя гудӧкалӧ да сьылӧ весиг. Чуньясыс эз на ёнасӧ кывзысьны, но артмискодь.

— Зэв тай нин мастер вӧлӧмыд. Йӧзыс висьталӧны да кысь. Нолтӧ, «Бур батькӧд-мамкӧд олӧм» видлы. Ме сійӧс том дырйи зэв радейтлі сьывны, — корис пӧчыс.

Витя гоз-мӧдысь корсявліс нин гудӧк кизьяс вылысь тайӧ сьыланкывсӧ да эз сэтшӧм лёка и ворс ӧнісӧ.

— А «Шондібан» кужан? — ӧзйис, буракӧ, сьӧлӧмнас пӧчыс, мастер нин внукыс вӧлӧма да.

«Шондібан» кӧ нӧ он куж, кутшӧм тэ ворсысь?! Тадз Прокӧ Митрей шулывлӧ. Витя личкыштіс ӧти кизь, мӧдӧс, коймӧдӧс... Сійӧ весиг ачыс эз гӧгӧрво: чуньясыс корсьӧны кизьяссӧ али кизьясыс вӧзйысьӧны чуньяс улас. Вочасӧн ӧддзис и ӧддзис. Весиг, кыдзи велӧдыштліс Прокӧ Митрей, посньӧдлыны босьтчис.

Пӧчыс, тыдалӧ, том дырсяыс дум вылас усис да, сьывны кутіс:


Том олӧмӧй, том гажӧй,

Том пӧра коллялӧмӧй.

Дас квайт арӧс тыртӧмӧй,

Кызь арӧс виччысьӧмӧй.


Сэсся чеччис лабичысь да йӧктыны босьтчис. Тапйӧдлӧ джоджӧ кокъяснас и сьылӧ:


Визув юын, визув юын

Уна чери гыбалӧ.

Гудӧкнас пӧ коді ворсӧ,

Сійӧ менӧ радейтӧ.


Татчӧ и воссис ӧдзӧс да пырис батьыс.

— Зэв тай миянын гажа вӧлӧма, — нюмъяліс сійӧ. — Мися, мыйла миянӧ Прокӧ Митрейыс и локтӧма, а Виталей вӧлӧм гудӧкасьӧ. Бур лун, рыт ли, мамӧ. Кутшӧм праздник нӧ талун?

— Уф, мудзи, — бӧр пуксис лабичӧ пӧчыс. — Ми, пиӧ, пӧттӧдз нин сьылім да йӧктім Витякӧд. Некутшӧм праздник эз ков.

— А кысь нӧ гудӧкыс? Дзик на выль, тыдалӧ?

— Пӧчӧ вайис! — нимкодя артмис Витялӧн.

— Тэ, мам, он жӧ менсьым кывзысь, — дӧзмӧм гӧлӧсӧн шуис батьыс. — Кымынысь нин висьтавлі: чӧскыдджыка ачыд сёй да ю, а эн миян вылӧ деньгатӧ видз. Век мыйкӧ ньӧбалан. Гудӧктӧгыс на эськӧ овсис. Бӧрынджык ме кӧсъя вӧлі ньӧбны.

— А тэ, пиӧ, он помнит, кыдзи коркӧ, велосипедтӧ эг вермы ньӧбны да, бӧрдін? Внуклы кӧ нӧ ог ньӧб, кодлы сэсся? Мый меным деньгасьыс? Мичаасӧ пасьтассьӧма да чӧскыдасӧ сёйсьӧма-юсьӧма нин. Чай-сакар вылад тай уна оз ков, — воча кыв сетіс пӧчыс да Витя дінӧ шыӧдчӧмӧн содтіс: — Эн кывзы, донаӧй, сылысь броткӧмсӧ. Ачыс оз гӧгӧрво, мый висьталӧ. Ворс, ворс. Сьылӧмнад да йӧктӧмнад пӧ дырджык олан.

Батьыслӧн шуасьӧм бӧрын Витялӧн сьӧлӧмысь дзебсьыліс дзользьысь колипкайыс, но пӧчыслӧн кывъясыс бӧр ловзьӧдісны лэбачписӧ. Гудӧк шыаӧн на суис керкасӧ мамыс, коді локтіс жӧ удж вылысь.

А аскинас вӧлі Витялӧн чужан лун. Нёльӧд классыс пӧшти ставнас воліс. И уналӧн шензьӧмысла вомыс быдсӧн калькаліс, Витялысь ворсӧмсӧ аддзисны да. Бура и сьылісны. Весиг бать-мамныс коми сьыланкывъястӧ ливкйӧдлісны. Пӧчыс эськӧ сьыліс нин да.

Быдмис да Витя лоис зэв бур гудӧкасьысьӧн. Йӧзыс сійӧс Ворсысь Витяӧн и тӧдӧны. Быдӧнлы кӧ эськӧ сылӧн кодь пӧчыд.

Гижӧд
Гудӧк
Жанр: 

lkejrlkelkrgner klrjnelknfrkl ekjnrjkenfrej

1