АРХЕОЛОГ ВАНЯ


Ваняяслӧн керкаыс сулаліс сикт помын ю кыр йылын моз. Пӧшти орччӧн вӧлі вӧр, сӧмын сэтчӧ вотӧдз коліс вуджны бура ыджыд эжмӧм му, кӧні лун-лун ротъялісны ыжъяс да кӧзаяс. Татчӧ жӧ сиктсаяс пиысь кодсюрӧ вайліс тракторӧн керъяс да тшупліс прӧст местаас пывсян ли гид, мед нуны сэсся ӧшинь улӧ да лэптыны нитш вылӧ. Тайӧ му помсьыс, дзик нин вӧр дорсьыс, и аддзис ӧтчыд Ваня, кильчӧ вылӧ петіс да, палаткаяс, кутшӧмъясӧс тай зэвтлӧны кинояс вылын вӧрӧд-ваӧд ветлысьяс.

Аддзӧмсяньыс мыйлакӧ Ваняӧс кутіс кыскыны тайӧ палаткаяс дінас. Окота мунны — и ставыс. Но эз лысьт пырысь-пырсӧ му помас котӧртны. Первой лунас му шӧрын сулалысь ляпкыдик пес чипас дінӧдз сӧмын воліс да разведчик моз ӧтведайтіс, мый палаткаас олысьясыс вӧчӧны.

Найӧ вӧліны куимӧн. Кык мужичӧй да ӧти нывбаба. Нывбабаыс бергаліс надзӧникӧн тшынасьысь бипур дорын, а мужичӧйяс, зэв видзчысьӧмӧн, быттьӧ весиг полӧмпырысь, бертісны зырйӧн эжаысь восьтӧм нин мусӧ да зэв жӧ видзчысьӧмӧн чабралісны тайӧ мусӧ кинаныс. Тадз жӧ Ваня корсьлӧ нидзув, но оз татшӧм ньӧжйӧ. Тадз кӧ нюжмасьны кутан, лун джынсӧ ковмас корсьны, кор сэсся черисӧ кыян? Вуграсьны кӧ карысь ли кысь ли локтісны, коліс сиктысь вылӧджык кайны. Сэні бур йиръяс эмӧсь, мича чери ваас путкылясьӧ.

А, гашкӧ, зарни корсьӧны? Ульянаса манастырлысь зарнисӧ да быдсяма пӧлӧс озырлунсӧ, шуӧны, коркӧ дзеблӧмаӧсь да, гашкӧ, татчӧ саймовтлісны? Зэв на-й вермас лоны. Со тай сімӧм кӧрт флага кӧлӧкӧльняыс манастырлӧн орччӧн моз тыдалӧ, верст вит кӧть сэтчӧдз лоӧ-а.

А мыйла татчӧ локтісны да ю кыр йылас, эрд вылас дзебисны, эз мӧй бурджык места сюр? Медся на бур вӧрӧ дзебны, мед ачыд тӧдін дай. Да и, зарни кӧ корсисны, эз эськӧ йӧз син водзын лукйысьны. Пиратъяс тай кинояс вылад войнас корсьӧны.

Быдсяма пӧлӧс мӧвпыс бергаліс лунтырнад Ванялӧн юрын. Вунӧдіс весиг вуграсьӧмсӧ, кӧть эськӧ рытсяньыс нидзув корсьліс да Ӧльӧш тыӧ ветлыны лӧсьӧдчыліс. Дзик быд лун жаритмӧнтӧ вайлӧ да мамыс удж вылысь локтӧм бӧрын весиг шензис. Ковмис шуны, мый юрыс висис да эз ветлы. Абу эськӧ бур пӧръясьнытӧ, да мый вӧчан?

Вольпасьӧ водӧм бӧрын дыр на бергаліс, некыдз эз куньсьыны синъясыс. Сӧмын вой шӧр бӧрас нин, кор кадсӧ стӧчмӧдіс орчча керкасалӧн петукыс, медбӧрти босьтіс жӧ унмыс.

Сёрӧнтӧ водӧмнад эськӧ, тӧдӧмысь, дыр узис, но аслас вӧтыс сизим часын на садьмӧдіс. Быттьӧкӧ сійӧ муніс корсьны зарни да веськаліс джунглиӧ. Гӧгӧр быдсяма пӧлӧс зверыс, тигрыс и леопардыс, гиенаыс и крокодилыс, но сійӧс некод эз вӧрзьӧд. Ӧти шимпанзе весиг зарни корсянінӧдзыс вайӧдіс. Зэв ыджыд пу быдмӧ, а сысянь воськов дас сайын крест сулалӧ. Дыр олӧмсьыс сьӧдасьӧма нин. Некод, тыдалӧ, сувтӧдӧмсяньыс абу матыстчылӧма. Босьтіс Ваня кӧрт зыр да кутіс шыблавны мусӧ крест гӧгӧрсьыс. Бура джуджыда нин пырис муас, кыдзи кодкӧ сійӧс тшапнитіс киӧдыс. Видзӧдліс да муртса гатшӧн эз усь: гу дорышас сулаліс индеец. Чужӧмсӧ краситӧма, пиньяссӧ жергӧдӧма.

— Мыйла нӧ, — шуис Ванялы, — гусясян, миянлысь зарнисӧ пышйӧдны кӧсъян? Юрсьыд кучиктӧ кулям.

Ваня весьӧпӧрис да та вӧсна, тыдалӧ, и садьмис. Сьӧлӧмыс чеччӧ — тайкӧ морӧссьыс петас.

Палаткаяс дінас кӧсйис нуӧдлыны Витяӧс, но сійӧ батьыскӧд войколӧн чери кыйны мунӧма. Та вӧсна тӧрытъя моз жӧ му лукйысьяс дінӧ мӧдӧдчис ӧтнас. Но талун эз нин джӧмды туй шӧрас, матыстчис надзӧникӧн да сувтіс зыръя войтырсянь воськов дас сайӧ кымын. Ачыс шыӧдчыны эз лысьт. Надейтчис, мый корсьысьысьяс пӧвстсьыс кодкӧ мыйкӧ шуас ли, корас ли. Сідзи и лоис. Тошкаыс да медся кузьыс юаліс:

— Мый нӧ зонкаыслы колӧ? Тшӧтш жӧ клад кӧсъян корсьны? Лок, лок, пиӧ. Гашкӧ, и сюрас. Ми тай корсям-а.

«Збыль мӧй манастырыслысь дзебӧмсӧ корсьӧны?» — синъясыс югзисны Ванялӧн. Сійӧ нӧшта матыстчыштіс верстьӧ йӧзлань, но эз сэтшӧма, мед позис судзны киӧн.

— Лок, лок, эн пов, — корис водзӧ тошкаыс. И кор Ваня матыстчис дзикӧдз, юаліс: — Кыдз нӧ, пиӧ, тэнӧ шуӧны?

— Ваняӧн, — вочавидзис Ваня.

— Кымынӧд классын нӧ тэ, Ваня, велӧдчан?

— Нёльӧдӧ вуджи.

— Сідзкӧ, тэ тай ыджыд нин, буретш клад корсьысь и эм. Кӧсъян он корсьны кладсӧ?

Кыдз нӧ оз? Колӧкӧ, кутшӧм донатор сюрас. Сы мында деньга сетасны. Велосипед позяс ньӧбны... Оз, велосипед вылӧ лякӧссьыны оз кут, ньӧбас мопед, мед дулльыс Витялӧн петас, зэв тай жалитӧ велосипедсӧ. Дзайган лунтыр, а сетлас сӧмын кык керка кост гӧгыльтчыны.

Юалӧм вылас эз вочавидз, а видзӧдліс сӧмын тошка морт вылас. «Ог» кӧ шуис, эськӧ пӧръяліс, а окотитӧмсӧ эз петкӧдлы. Ещӧ горшӧн шуасны дай. Ваня абу сэтшӧм, мед кӧть мый му пытшкас куйлӧ.

— Аддза, аддза, кӧсъян, да он лысьт висьтавнытӧ, зэв вежавидзысь кутшӧмкӧ, — пыр на ӧтнас сёрнитіс Ванякӧд тошка кузь мортыс. — Миянлы тӧрыт уна нин зарниыс сюрис. Часлы, ме тэныд петкӧдла, виччысьыштлы.

И мортыс воськовтіс ортсыӧ ляпкыдик на гу кодьысь да муніс кодйысянінсянь палатка дінас. Воис мыйӧн, босьтіс мыйкӧ ывлавывса лабич вылысь да бӧр матыстчис Ваня дінӧ.

— Со миян зарниыс, — восьтіс сійӧ шахматӧн ворсан кӧрӧб кодьӧс, кытысь Ваня аддзис посньыдик гырнич торъяс, сімӧм пуртъяс да нӧшта кутшӧмкӧ торпыригъяс.

Ванялӧн муртса эз пӧлӧстчы чужӧмыс. Чайтіс аддзыны сэтшӧмтор, мыйысь синъясыд шонді вылӧ видзӧдӧмысь моз пемдӧны, а сылы петкӧдлӧны кутшӧмкӧ лӧп. Дзоридз доз улысь таысь на мичаджык гырнич торйыд быд ӧшинь улысь сюрас, сімӧм пуртыд да.

— Чайтін, мешӧк тыр зарни деньга петкӧдла? — нюмъяліс кузь тошкаыд. — Ӧдвакӧ сійӧ тані эм. А вот мый сюрис да, тӧдӧмысь, сюрас на, миянлы збыльысь зарни кодь дона. Найӧ кольӧмаӧсь важ коми йӧзсянь, кодъяс овлӧмаӧсь тані зэв-зэв важӧн, муртса на вӧлӧм кужӧны вӧчны ичӧтик пуртъяс да мый да. Эмӧсь Коми муын и тіян районын местаяс, кӧні йӧзыс таысь на важӧнджык овлӧмаӧсь, ньӧвйӧн на зверь-пӧткатӧ кыйлӧмаӧсь. Ми быд во корсям татшӧм местаяссӧ. Таво со татчӧ локтім. Тіян Ульяна манастыр гӧгӧрад вель уна сэтшӧмыс. Миянӧс шуӧны археологъясӧн. Сюрӧмторъяс сертиыс тӧдмалам, кыдзи-мый коркӧ овлӧмаӧсь. Важ олӧмсӧ, Ваня, бура колӧ тӧдны. Школаад, кӧнкӧ, та йылысь висьтавлісны нин. Эн на кӧ велӧдӧй, велӧдны кутанныд.

Висьтавнытӧ эськӧ висьтавлісны, но мед Ульяна дорын зверь куӧ на пасьтасьӧм йӧз коркӧ овлісны — татшӧмтортӧ Ваня первойысь на кыліс. Первойысь аддзис и ловъя археологъясӧс, кодъяс пиысь ӧти сыкӧд сэтшӧм мелі.

Зонка кывзіс верстьӧ мортлысь висьталӧмсӧ, и синъяс водзас сувтіс серпас: пожӧма яг шӧрын, паськыд эрд вылын югыда ломтысьӧ бипур. Сы весьтын жаритчӧ потш вылӧ ӧшӧдӧм йӧра зад. Би ӧтар-мӧдарас сулалӧны кыкӧн да бергӧдлӧны надзӧникӧн потшӧс, мед яйыс жаритчис гӧгӧрбок. Бипур дорын бергалӧны челядь. Ок и чӧскыда сёясны талун, верстьӧяслы йӧраӧс уськӧдны удайтчӧма да. Найӧ, быдмасны да, смелӧсь да винёлӧсь жӧ лоасны. Мужичӧйяс пукалӧны пӧрӧм пу вылын бипурсьыс ылыстчыштӧмӧн, гораа варовитӧны. Нывбабаяслӧн асланыс жӧ котыр. Юрсинысӧ сыналӧны да мый да. Гӧгӧр сӧмын пуяс. Некутшӧм керка ни карта, му пытшкӧ вӧчӧм гуясын олӧны да. Сӧмын юр весьтаныс енэж да кыр горулын ю, кодӧс ӧні шуӧны Эжваӧн.

И быттьӧ мыйкӧ вӧрзис Ванялӧн сьӧлӧмын. Окота лои видлыны сюрӧмторъяссӧ. Босьтліс киас ӧтиӧс, мӧдӧс... Найӧ шонтісны ки пыдӧссӧ шонді водзын куйлӧм плавкӧс галя из моз, кӧть эськӧ таӧдз куйлісны кӧрӧб пытшкын да шонді югӧръяс улӧ эз веськавлыны. Гашкӧ, Ванялӧн пӧсь вӧлі аслас киыс, а гашкӧ, шоныдыс локтіс сійӧ бипурсяньыс, кодӧс ӧзтісны йӧра яй жаритысь важ коми йӧзыс.

— Мыйкӧ дыр варовитанныд, Владимир Борисович, — кодйысянінсянь не то горӧдіс, не то шуис турунвиж курткаа да сэтшӧм жӧ гача косньӧдіник мужичӧй.

— Ме, Иван Васильевич, зонкаыслы чужан му йывсьыс висьтала, кутшӧм сійӧ сылӧн гажа да озыр.

— Ёна ӧнія челядьыдлы чужан муыд колӧ да. Пакӧститны да рӧзӧритны сӧмын видзӧдӧны...

— Эн шу, Иван Васильевич. Абу на быдӧн сэтшӧм. Кодкӧ и видзны да дорйыны кутас. Миян моз лукйысьны-и. Сідз ӧд, Ваня?

Батьыс ног жӧ дзик, ыджыд морткӧд моз, сёрнитіс сыкӧд кузь тошкаыс, сылы позис эскыны, и Ваня, вочавидзӧм пыдди, гогнитіс юрнас.

Тайӧ лунсяньыс сійӧ лун-лун вошласис археологъяс дорын.

Вуграсьӧмыс и ставыс вуніс. Челядь сылы весиг Археолог ним пуктісны. Но и мед, зэв на и лӧсьыд кывйыс, сӧмын тай сьӧкыда шусьӧ-а. Гашкӧ, збыльысь и лоас археологнас, уна-унатор чужан му йывсьыс тӧдмалас да мукӧдлы, мед тӧдісны жӧ, висьталас.

Гижӧд
Археолог Ваня
Жанр: 

lkejrlkelkrgner klrjnelknfrkl ekjnrjkenfrej

1