ТУЛЫС

Заводитіс шонді
Тӧвлысь вежны лад,
Яра сотны пондіс,
Воис тувсов кад.

Кӧдзыд лун-вой быри,
Сыліс еджыд лым,
Юыс ваӧн тыри,
Гымалӧ нин гым.

Надзӧникӧн киссьӧ
Муяс вылӧ зэр.
Сулалӧ да мыссьӧ
Зэрнас пемыд вӧр.

Нимкодясьӧ сэтӧн
Небыд коръя кыдз.
Мича турун петӧ,
Вежӧдӧма видз.

Мӧдлапӧлын кылӧ
Утка, дзодзӧг, юсь.
Колипкай нин сьылӧ,
Колипкай оз узь.

Зіля гӧрӧ, кӧдзӧ
Муяссӧ колхоз.
Трактор вылӧ пӧчӧ
Дзоргӧ шензигмоз.

Челядь котыр ворсӧ,
Котралӧ лунтыр.
Тувсов гажа горсӧ
Кылан сэні дыр.