МИЯН МЕДВОДДЗА ПРОГРАММА

Курс вылын велӧдчигӧн на ми арталім, кутшӧм репертуар (программа) ковмас лӧсьӧдны коми театрлы ӧнія (первойя) кад кежлас, мый вылын сійӧ кутас уджавны сиктъясті ветлігӧн. Сэсся воим со мыйӧ: 1) воӧ Октябрса революциялӧн годовщина; 2) тайӧ каднас жӧ (1919 воын) еджыдъяс волісны Коми муӧ; 3) мунӧ ударнӧй удж — вӧр лэдзӧм; 4) босьтчӧма тышкасьны классӧвӧй врагъяскӧд да пемыдлункӧд; 5) некор оз ков вунӧдны СССР-ӧс дорйӧм мог. Вот тайӧ темаяссӧ и босьтім ми медводдза программаӧ:

1. «Вӧрын» — ӧти торъя драма, войвывса гражданскӧй война дырся олӧмысь, партизанъяс вермасьӧмысь.

2. «Мути чужӧм» — ӧти торъя теш пемыдлун бырӧдӧм кузя, кулакъяслысь лёк вӧчӧмсӧ петкӧдлӧ тшӧтш зэв ёся.

3. Сьылӧмъяс — тайӧ темаяс кузя жӧ.

4. «Ключ» — 1 торъя теш вӧр лэдзан уджлы торкӧм йылысь.

5. «Гӧрд армия» — оратория, СССР-ӧс дорйӧм йылысь.

Нӧшта эмӧсь частушкаяс, оркестр да физкультура ногӧн йӧктӧмъяс.

Дерт, быд удж гӧгӧр ӧтпырйӧ он вермы инмӧдчыны, сӧмын тайӧ программаыс ӧнія кад кежлас ёна лӧсялана. Водзӧ вылӧ ковмас, дерт, пыр выльмӧдны да содтавны репертуарнымӧс. Ӧні тайӧ уджыс дзоньнас усьӧ ас выланым, медъёнасӧ, дерт, ме вылӧ. Сӧмын сыысь огӧ шогсьӧ — уджалам зіля, мый вермам — вӧчам, сідзи тшӧктӧ чорыд ӧдӧн пуан кадыс.