КЫДЗИ ТАВО КУТАС УДЖАВНЫ КОМИ ТЕАТР

Лоӧ лӧсьӧдӧма ядра. Колӧны коми артистъяс

Ёна нин ноксьӧма вӧлі колян воясӧ коми театр кыпӧдӧм понда. Мыйсӧ абу вӧчӧма да тэчӧма. Сӧмын ӧнӧдз на нинӧм эз пусьы прамӧя — коми театрлӧн уджыс водзӧ эз вӧрзьыв. Мӧйму эськӧ вӧлі бюджетысь нин лэдзыштӧма сьӧмтор, да бара на жӧ театр эз уджав. Медыджыд помкаыс вӧлі сэтшӧм: артистъясас вӧліны служащӧйяс, асланыс да уна пӧлӧс общественнӧй уджӧн тырӧм войтыр: репетицияяс вылӧ оз эшты волывлыны, спектакль вечернянас вӧлі артистӧс кытчӧкӧ командируйтасны, — ставыс жугалӧ, разьсьӧ вӧлі. Сы вӧсна и эз ло театрлӧн кыпӧдчылӧмыс колян сезонас. Та йылысь вӧлі гоз-мӧдысь гижӧма нин «Югыд туй» газетӧ.

Таво вылӧ коми театр лӧсьӧдчӧ мӧд ногӧн уджавны. Ӧти-кӧ, лоӧ ичӧтик штат, «Сыкомтевчуклӧн» ядра. Мӧд-кӧ, артистъясас босьтавны сэтшӧм йӧзӧс, кодъяслӧн унджык эм прӧст кадыс, медым эськӧ ворсігкості эз мырддьыны артистӧс да эз торксьы уджыс. Коймӧд-кӧ, быд тӧлысьын шуӧма вӧчны этша вылӧ куим спектакль (колян во вӧлі шуӧма кыкӧс); сы вылӧ ӧні колӧ нин лоны условйӧыс: лоӧ ядра, конкурс сетас (чайтам) бура уна выль пьесаяс. Сэсся надейтчам: бюджетнӧй комиссия колян вося сметалысь ыдждасӧ таво оз жӧ чинты (чинтас кӧ, дерт, бара нинӧм оз ло, — сэки весиг уджас кутчысьныс нинӧмла).

Ӧні коми театрлӧн сулалӧ медводдза могыс со кутшӧм: лӧсьӧдны ядрасӧ, — сэтчӧ колӧны сцена вылын ворсны кужысьяс. Кодъяслӧн эм окотаыс да сямыс — шыасьӧй обполитпросветӧ (либӧ ме дінӧ) торъя гижӧдӧн кӧть кывйӧн.

Сэсся мӧд мог: ядраысь кындзи на ковмасны коми артистъяс (быд ворсӧмысь торйӧн мынтысьӧмӧн). Татчӧ бара жӧ колӧны прӧстджык йӧз да ворсны кужысь семьяяс. Колян во босьтавлім сэтшӧм артистъясас совпартшкольникъяс пӧвстысь, да эз жӧ вӧв зэв шань: пӧшти быд рыт занятӧсь асланыс велӧдчан уджӧн.

Театрлӧн сезоныс заводитчӧ нин. Колӧ тэрмасьны. Нолтӧ, коми артистъяс, шыӧдчӧй! Босьтчылам тавосянь бурджыка кыпӧдны коми театрлысь уджсӧ.