ПИСАТЕЛЬ-ГЕРОЙ

Радио вайис зэв шогсяна юӧр: кувсьӧма миян сӧветскӧй писатель-орденоносец Н. А. Островский. Дугдіс тіпкыны ӧзъялан сьӧлӧмыс «Как закалялась сталь» да «Рожденные бурей» гижысьлӧн.

Вӧвлі-ӧ коркӧ свет вылас сэтшӧм ыджыд мужествоа да пытшкӧс вынйӧра морт, кодӧс мед вӧлі жугӧдӧма паралич, оз вӧрзьывны кияс-кокъяс, оз аддзыны синъяс, да мед сэтшӧм мортыс некор эз элясьлы аслас судьба вылӧ, эз няргыв, а став сьӧлӧмсьыс нимкодясис олӧмыс вылӧ, вермасис сы вӧсна да нӧшта гижис вылын качествоа, джуджыд пытшкӧса художественнӧй литература? Покойнӧй Николай Алексеевич Островский вӧлі тшук сэтшӧм мужествоа морт. Сійӧ аслас висьӧм вылӧ видзӧдтӧг сетіс пыдӧ вежӧрад йиджана литературнӧй образецъяс, кыдзи колӧ вермасьны да косясьны социалистическӧй олӧм вӧсна, мед перйыны победаяс, кодъясӧс пасйӧма выль Сталинскӧй Конституцияын.

Ми унаысь на элясьлам олӧмным вылӧ, пойгывлам сьӧкыд удж водзын. А вот сэкъясӧ эськӧ колӧ казьтыштлыны Островский ёртлысь олӧмсӧ да уджсӧ. Сійӧ медбӧръя олан здукӧдзыс нимкодясис выль олӧмӧн, Сталинскӧй Конституцияӧн, пуан сьӧлӧмсьыс нетшкысис тышкасьны социализм вермӧм вӧсна, некор эз лябсьыв, эз няргыв, а эськӧ сы вылӧ сылӧн вӧлі ыджыдджык помкаыс миян дорысь. Сійӧ вӧлі збыльвылӧ мужествоа герой.

Шогсьӧмӧн копыртамӧй юрнымӧс сійӧ прах водзын да сьӧлӧманым видзамӧй сы йылысь память!

Коми писатель Нёбдінса Виттор

23—ХІІ—1936