КЫПӦДАМӦЙ КОМИ ГАЗЕТ!


Зэв сьӧкыд миянлы кыскыны «Югыд туй» газет тыра телеганымӧс. Мырсям, тужитчам водзӧ нуны эськӧ да, пыр бӧрӧ кыскӧ. Воддза воясас, кор газетыд вӧлі разалӧ прӧста (бесплатно), петӧ вӧлі нёль сюрс, таво кайлім нин эськӧ кык сюрсӧдз, кӧсъям вӧлі воны вит сюрсӧдз, сэсся бӧр исковтіс бӧрӧ — воим сюрс сизимсёӧдз... Со вит воӧн кутшӧма миян газет лыдным вежласис. 1920 воын: 1000, 900, 1300, 1100; 1921 воын: 1200, 1500, 1200, 1500, 1600, 1700, 2000, 4000; 1922 воын: 2000, 1000, 1200, 1100, 1000, 1200; 1923 воын: 1550, 1700, 1750, 1800, 1850, 1900, 1950, 2050, 2100, 2150; 1924 воын: 2000, 1700.

Со ӧд кутшӧма миян газетным ыръянитӧ!.. Этша нин ми и горзім: вайӧ, кыпӧдамӧй газетнымӧс вит сюрсӧдз! — Нинӧм, некод эз горӧдчы воча, прӧста сӧмын гӧлӧсным сибдіс...

Збыль ӧмӧй некыдзи оз позь кыпӧдны миянлы газет лыдсӧ? Позьӧ эськӧ да, некод, буракӧ, та йылысь прамӧйджыка оз думышт.

Босьтам Сыктывдін кар. Мыйта тані пропсоюзса шленъяс, коммунистъяс, комсомолечьяс, служащӧйяс! Чайтам, сюрс мортыд сюрас. Унаӧн-ӧ судзӧдӧны газет Сыктывдін карын? Сӧмын 338 газет, став учрежденньӧяснас тшӧтш! Этша, вывті этша. Сэтшӧм жӧ быд карулын, быдлаын зэв этша судзӧдӧны газет.

Колӧ бурджыка та йылысь мӧвпыштны. Быд пропсоюзлы колӧ индыны-тшӧктыны, мед став шленыс судзӧдӧны газет; коммунистъяслы важӧн нин вӧлі тшӧктӧма судзӧдны «Югыд туй», — колӧ комитетъяс пыр ещӧ индыны.

Оз ков вунӧдны: кымын унджык газет лыддьысь, кымын унджык газет кутас петны, — сымын бурджык лоас газетным.

Газет лэдзӧм сулалӧ зэв дона. Сьӧмным миян оз тырмы, лоӧ пыр йӧжгыльтчыны, — кыдз шуасны: «эшкын серти коктӧ нюжӧдны». Миян кӧзяйственнӧй, тӧргӧвӧй организацияяс ньӧти оз отсавны. Обисполком оз вермы сетны сьӧм местнӧй бюджетысь тырмидз, государство оз жӧ вермы нинӧмӧн отсавны, — сідзи-й лоӧ мырдӧн сорӧн пычкыны нумерысь нумерӧ.

Ми надейтчам, мӧд сюрс нумер тыртігӧн бурджыка кутасны видзӧдны газет вылӧ, быдӧн отсаласны кыпӧдны, паськӧдны ассьыным коми газет.

Колӧ, колӧ! Босьтчыламӧй ставным!


Гижӧд
Кыпӧдамӧй коми газет!
Йӧзӧдан во: 

lkejrlkelkrgner klrjnelknfrkl ekjnrjkenfrej

1