«СЮРС»

Ёна дыр лои кыскыны сюрс номерӧдз миянлы ассьыным газет. Квайт во! Уна пуктӧма сюрс номерад удж — вежӧр, мӧвп, вын. Бурджыка кӧ мӧвпыштан, сюрс номерад сюйӧма коми йӧзлысь квайт вося олӧмсӧ, тільсьӧмсӧ, вермасьӧмсӧ.

Войдӧр, кор кутіс петны Сыктывдінкарын газет, некод эз весиг думыштлы, вермас пӧ коркӧ тырны сюрс номерӧдз сійӧ газетыс. Вермис тай! Первой надзӧник — кор вежоннас ӧтчыд, кор тӧлысьнас кыкысь, — пыр вочасӧн ӧддзис сэсся петны асланым газет. Унджыкыс петавліс, дерт, рочӧн. Сӧмын тавосянь кутіс петны коми сорӧн.

Октябрса революция восьтіс быдпӧлӧс посни йӧзлы паськыд туй велӧдчыны. Тшӧтш революция югӧрыс воис и Коми муӧ. Нэмӧвӧйся сьӧд синкӧртӧдъяс разьсялісны коми войтырлӧн. Вӧчим аслыным автономия (ас ногӧн олӧм), коми кывтӧ некод нин ӧні оз лысьт кедзовтны, видны. Овмӧс ёна нин бурмис, водзӧ на кыптас, сӧмын колӧ овны выль ногӧн. Выльногса олӧмас велӧдас асланым коми газет.

Лоӧ татчӧ ещӧ шуны: миян коми йӧзыд омӧля на лыддьӧны ассьыныс газетсӧ, — гашкӧ, пемыдлунысла, гашкӧ, сьӧкыд уджысла, гашкӧ, абу велавлӧмаӧсь да... Ми думайтам, коми крестьянин оз лыддьы газетсӧ дзик прӧста — абу велавлӧма сэтчӧ, кыдз шусьӧ, привычкаыс абу сылӧн. А лыддьыны эськӧ зэв колӧ: колӧ лыддьыны непӧштӧ газет, колӧ лыддьыны тшӧтш бур нигаяс, сы серти велӧдчыны бура видз-му уджавны, овмӧс кыпӧдны, сьӧкыд уджсӧ кокньӧдны. Ми сьӧлӧмсянь сиам уджалысь коми войтырлы: мӧд сюрс номер тыртігӧн матӧджык сибӧдчыны асланыс газет дінӧ, ёнджыка лыддьыны, бурджыка велӧдчыны, медым регыдджык вермасны мездысьны сьӧкыд уджсьыс!