КЫЛӦДӦЙ ВӦРНЫТӦ!


Куим во Сӧветскӧй власьт оліс би кытш пиын: гӧгӧр буржуйяс-озыръяс вӧлі жмитӧны, нинӧм эз лэдзлыны вайны миян муӧ заграничасянь.

Ӧні Краснӧй Армия миян мездіс уджалысьясӧс омӧль йӧз улысь, ӧні оръясис став Роч му гӧгӧрысь чорыд кытшыс. Воӧ выль олан кад Россиялы.

Вӧчӧма мир Польшакӧд, Турциякӧд, Персиякӧд, Бухаракӧд, Англиякӧд, мукӧдъяскӧд.

Став гырысь озыр государствоыс гӧгӧрвоис — Россиякӧд пӧ колӧ бурӧн овны.

Налы кӧ колӧ бурӧн овны, миянлы сійӧ ёнджыка колӧ.

Тайӧ войнаясӧн миян ставыс чирссьӧма. Мый дорӧ он кутчысь — сійӧ и абу, некутшӧм уджалан кӧлуй нин эз коль миян, кысь нин эськӧ гырысь машинаяс да!

Ӧні сэсся Россия мӧдӧдчас заграничнӧй государствояскӧд вежласьны эмбурӧн. Мый миянын абу — сійӧ кӧнкӧ мукӧд муясын эм: миян уджалан кӧлуй да машинаяс абу — Англияын сійӧ эм; Англияын вӧр абу — миян сійӧ эм, сідзи-й мукӧдтор.

Деньга вылӧ оз сюр унатор: «Мый пӧ миянлы деньгасьыд», — шуасны, дай гумага деньгатӧ некод оз босьт, босьтны кӧ — толькӧ зӧлӧтӧй деньга, а зӧлӧтаыд ӧд сідз нин — зӧлӧта, донатор, дай зэв этша сійӧ.

Колӧ зӧлӧта пыдди мыйкӧ мӧдтор лӧсьӧдны.

Ӧні став Роч му пасьтаыс мунӧ лӧсьӧдчӧм мукӧд государствокӧд вузасьны-ньӧбасьны (торговля) да эмбурӧн вежласьны (товарообмен).

Миянын, Коми муын, мый позьӧ лӧсьӧдны сы вылӧ?

Дерт, вӧр.

Миянын вӧр медуна, — сійӧ зӧлӧта моз жӧ мукӧд муясын колӧ.

Матысмӧ тулыс.

Медыджыд мог миян: лӧсьӧдчыны тӧвся лэдзӧм вӧртӧ пуръявны да места вылӧдз кылӧдны.

Кылӧдны ыджыд тувсов ва дырйи жӧ.

Воддза вояснад ещӧ не сэтшӧма на вӧлі колӧ вӧрыд: Кардорӧ оз позь вӧлі кылӧдны, мӧд государствоӧ оз позь вӧлі нуны.

Таво Россия лӧсьӧдчӧ тӧварӧн вежласьны мукӧд государствояскӧд, вайны сэтысь тӧваръяс, мый миянын абу. Медуна тӧвар миянлы лоӧ вежлавны вӧр вылӧ.

Колӧ мый эм лэдзӧм вӧрыс — ставсӧ кылӧдны, оз ков куръяясын да берегын косьтыны.

Колӧ тӧдны, вӧр пыдди мукӧд муяссянь миянӧ воас уна пӧлӧс кӧлуй, медся колан тӧвар: косаяс, чарлаяс, быдсяма му уджалан машинаяс, матерйӧяс, кӧмкотъяс, заводъяс вылӧ, кӧрт туйяс вылӧ коланторъяс, — быдтор воас.

Унджык кӧ вермам кылӧдны вӧр — унджык и тӧвар лоӧ.

Сэсся асланым республикалы колӧ уна пес: кӧрт туй машинаяс, паракодъяс, пабрикъяс ломтысьӧны пескӧн. Сувтасны кӧ найӧ (кыдзи неважӧн лолі) — ставыс сувтас.

Со ӧні ті, крестяна, асьныд аддзанныд: кутшӧм колантор вӧрыд!

Сьӧкыд, дерт, тіянлы вӧлі тайӧ воясӧ. Но ӧнісянь кутас пыр вочасӧн справитчыны олӧм.

Став сьӧкыдыс ӧд вӧлі войнаяс вӧсна да гӧгӧр жмитӧмыс вӧсна (блокада).

Ӧні сійӧ ставыс быри, ӧні Сӧветскӧй власьт кутчысьӧ эмбур лӧсьӧдны бур уджӧн.

Босьтчылӧй жӧ ставныд вӧр кылӧдан дор!

Тувсов вакӧд миянсянь мед мунасны уна пӧлӧс тӧварла гырысь пуръяс!


Гижӧд
Кылӧдӧй вӧрнытӧ!
Жанр: 
Йӧзӧдан во: 
Ӧшмӧс: 

lkejrlkelkrgner klrjnelknfrkl ekjnrjkenfrej

1